"Mayapa, antoy impaliwawa nen catedrátiko1 tayo karoman ey?" kuanen Juaniton tinepet ya insananey so tungtongan.
"Anta anggapoy klasi karoman!"
"Sirin? Karoman a sakey ey?"
"Agay kala saló, amtan a jueves!"
"Sian tua, agay lay inkamureng ko! Amtam sika, Plácido, manmamaliwak ya alimangaw. Mapalaloy kalilibang na kalakal ko. Sanen mierkoles ey?"
"Sanen mierkoles? Alagar ka.....sanen mierkoles inmayamayá to."
"Inabigan to! Sanen martes, aro, ey?"
"Sanen martes inkianak nen catedrático, tan linma kamin awit mi orkesta, bineberber a sipol na rosas tan nambabangil iran iniiter min impamista ed sikato.
"Abagay lay impakalingoan ko!" kuanen Juanito, "alimangaw ak la lantin kuanko et! Mayapa, atepet toak?"
Sinintak nen Penitente ray abalá to.
"Awey ey, balet ta inter dad sikatoy angisulatay ngaran daray amista."
"Agay la! Antoy ginawa yo balet nen lunes ey?"
"Lapod kasian agew na klasi, nanpasalista insan angiter na leksion a nipaakar ed saray espejo. Nia, nengneng mo, manlapo dia ya anggadia, ipatlep ya anggapoy natilak a salita.....lagsanan yan pasen ay, insan saya ay!"
Insan to itoturoy tamoró tod mad libroy Física ya gaway Ramos, no dinan iray pasen ya áralen, nen biglan nibantak so libron sankabenbenan to ta andi pasantabin tiniplak ren Juanitod siko ya impaarap ed tagey.
"Paulian mo pala saló ratay leksion ta, ta gaween tayon agew a pichido."
Say tatawagen day manaaral ed Ibale na agew a pichido samay manlapod aseldet na duaran pista et gaween met lan bakasion, singa bilang apasout a nakal ta sikatoy labay day manaaral.
"Anggapoy kalakal mon tua!" kuanen Plácidon mapalaloy sanok to tan dinukdok to ray libro tan papipapil ton nitaytayak.
____________________________
1 Sikatoyay panangingaran ed kastila ed manbabangat na atagey la ran aral, karrera ono profesión, singa bilang abogacia, medicina, etc.
