"Gaween tayon agew a pichido!" kuanen Juaniton umanumanen.
Si Plácido agto; sakey ni nisesengeg ed ag yorong na duara labat, saray papári agda kapotay klasi na masulok a sanlasus tan limamplon estudiante. Insan nanonunotan to met iray sagsagpot tan panagsimpit kalamor nen iná to, ya ngalngalin agla manaliw na onkanan nakaukolan to ta pian labat napanaral tod Ibale.
Diad saman peles dan ondadalan ed samay gesang na padir ya onarap ed Santo Domingo.
"Nanunotan ko," kuanen Juanito nen kanengneng tod samay plasan melag¹ ed arap na daan lan abong a kawalaay opisinay Aduana; "siak manayay mansisingil na usos!"
"Usos a?"
"Say onkanad monumento!"
"Monumenton?"
"Monumento nen pári Baltazar! Agmo sirin amta?"
"Siopa tay pári Baltazar ey?"
"Agay ka la, sakey a dominiko! Kanian saray papári kekerewen day tulong day estudiante. Andala dia tay taló ono apat pisos mo ta piano nanengneng dan malágay itayo! Tan agdan balot nibaga ya ag nipaalagey so sakey a talintao no ag ira manggatos! Dalí la Placidete ta masulosulok so pakabawim ed satan a kuarta ed naalam a kaabigan."
Insan to kinindatan na walay ibabagato. Anunotan nen Plácido may sakey ya estudiante ya makasásapat ed iksamen nisesengeg ed panagrigalo toy manok a canario, kanian angiter met lay taloy pisos.
"Nengneng mo, isulat koy ngaran mon malinlinew, Plácido Penitente, taloy pisos. Ah, wala ni manayay labay kon ibagá! Duay simban manlapod natan, pista nen profesor tayod Historia Natural.....Amtam la saloy abig na ugáli to, mainomay a katalusan, agto itayon balot mamarkaan anggan ag itayo onorong insan agto itayo met tetepetan, kanian nakaukolan ya ipatnag tayo met so kababáles tayo!"
"Sian tua!"
"Anto, ag kanepegan a pistaan tayo met? Say orkestan aleen tayo nakaukolan ya ag onsaginunor ed samay inkaná yo nen pinistaan yoy catedrático tayod Fisica."
________________________
1 Plaza España so ngaran to nen uley na kastila.
