"Tua met!"
"Antoy kuanmo no iyan tayoy usos ed sanderuay pisos? Dalí la Placiding, mangiter ka la natan, igapom la ta piano walad tuktok na listay ngaran mo."
Tan manlapod anengneng ton angiter ya andi abalay Plácido, impatumbok toy:
"Sustom lan apat ta ipawil kod sikay dua naani ta pian napatitan iray arum."
"No ipawil mo lan lamang ed siak, akin et iter ko ni ey? Agmo labat isulat so apat!"
"Sian tuá! Mapatpatnag lay katitiweng ko, anto? Andi bali, maong a siansia no mangiter kay apat pian walay nipanengneng ko!" Si Plácido pian agto napaturingay párin aminiag ed sikato, angiter.
Akasabí rad Universidad. Diad pinto tan ontan met ed nantopag a diking, wadman iray manaaral a manaalagar ed yakseb daray profesor da. Saray mangaalay duay taon ya onarap ed abogacia, saray manggradua ed "high school," tan ontan da met na manaaral na preparatoria ed medicina, masaysayaksak iray doipo ra, ya sarayay unor magmainomay iran ni biig ed kawes da tan awawey dan dumad saray arum; karaklan ed sikara nanlalapo rad Ateneo Municipal tan walan nibilang ed sikaray omaanlong ya Isagani, ya peles ton ipapaliwawad sakey ya iba toy leksion nipaakar ed kalegiás na liwawa ed ilabas tod duaran pasen a nandumay palet. Diad sakey a polok mansusupiat tan mansasangsangan ira, ouliten daray imbabagaray profesor da, saray lugay libro, tan saray sengeg a totuntonen ed kakabatan ono filosofia ya kuan; diad biek met a polok mangakaksion iran itagey dan iwaswaswas iray awit da ran libro, odino ipapaliwawa ran igugulis na baston dad dálin so ibabaga ra; dimad aragdawi, diad sakey met a polok manpapatey iray oras a manpapalabas ed saray marálit ya onlan mimisa ed kaabay a simbaan, tan nambabangil so balbalikas da ran masaysayaksak. Sakey ya akulaw ya akatabin ed sakey a malanguer nin marikit mankitkitlaey a maraldalit; samay marikit, osdong iray matá to ya nasisikig tan nababaingan ed idadalan tod arap na ontan lan karakel na manpapalabas; samay akulaw intagey toy sapey ton kolor na kapi ya abito ray Hermanas na Sta. Rita ta pian nanengneng iray sali ton malim-
