Manduarua no kasi ta onloob ni ono andila; ayari lan ginulisay petek na ngaran to tan agda met la man buralen. Say aakaran cd klasi aliwa met a say pakaaral no ag sa labat so ag kamarkaay ngaran na gulis, ta anggapo met so arum a gagaween ed klasi no ag sa labat so pangidalatdat na impatlep a liksion, panbasay libro, tan anganggaan la tay yebat ed sakey ono duaran tepet ya aliwan malinew, araldalem, makalingo tan agnatalusan; satan ingen ta ag nasasapoy antikey a sirmon.....ya apasakey.....! nipaakar ed kaabebay linawa, katutulok tan panamagalang ed saray papári tan sikato met abeban linawa, matulok, magalang. Ompoliktar lawarin onlala balet anunotan ton manasingger lay iksamen et agnin balot atepetan nen profesor to, tan agto ni ingen amó naimano; kanian sankaabigan la man a pakatawag toy imano nen profesor pian nakabat da. Say pakakabat na profesor ed sakey a manaaral kabaliksan toy akasapat la ya, ta no anggapoy irap na mangipelag ed sakey a toon ag kabat, nakaukolan met lay mapalalon awet na puso to piano ag napelag so panangasi ed sakey a tubonbalon say kiwala tod man et singa ituturing ton inagewagew so inkapirde sakey taon a bilay to.
Linmoob sirin si Plácido, tan ag nankolandit ya unong na naugaliyan to, no agta ginagala toy nantanol ya impalpalaltog so takoy sapatos to, tan masulosulok ya agamoran toy gagala to! Ninengneng nen catedrátiko, kinmoliseng, tan manpeyeng a singa bilang inkuantoy:
"Agka mangitaltalek! Manbayar kan siansia!"
