"E.....itopak tod sikatayoy guantes!" kuanen Pekson ya inoman a singa ngola ag mangitaltalek; "insan kayari to anto ey?"
Akatondan agagáy Sandoval ed onman lan liketo, balet ta manlapod mabilay lanti ulat day kakastila insan maipepetang so dalá ray managdiskurso, aganon akaimasmas.
"Kayari to?" kuanto met a tinepet; "kayari to no angga- pod saray pilipino so onangat a miarapan, siak a Sandoval, diad ngaray España, siak so miarap ta satan a polítika sumlang a tuloy ed saray maabig a kanunotay Inan-Bansá ya nipaakar ed saray kaluyágan ya ouleyan to, tan ontan met ya say sakey a manouley ya ekalan toy galang so bebenbenan ton betang tan lorlouren to ray nagnagnap a pakauley to, agto nepeg so yagel na Inan-Bansá tan kawaloey siopaman a mibabáley a kastila!"
Ag nasabsabaay liket na linawa ray onderengel. Si Isagani nilakap toy Sandoval, tan inalig da met na arum: sasalitaen day Inan-Bansá, say pankakasakey, say panaagi, say lugor. Say kuanda ranmay pilipino so no singa ra labat si Sandoval komoy kakastila ed España, singa ra met si Sandoval ya amin so wadia rad Pilipinas; mandarlang iray matá nen Sandoval tan no saman a bekta et wala labat so angitopak na guantes ed sikato, sinalimpato to komoy anggan antetan a kabayo ya akilaban a papatey nisesengeg ed kaabigay Pilipinas. Bukor nen managsebseb na liket so inmebat na onia:
"Maong, alay dakep, Sandoval; siak nayarian ko met itan ya ibaga no komon ta kastila ak ya inanak ed España ya singa sikayo; balet ta manlapod aliwaak a kastila, no ibagak so anggano kapaldua labat niratay balbalikas yo, sikayon díli ipasen yoak lan filibustero, ono onsusungpad onkukurang ya uley."
Ginapoan la nen Sandoval so nansalitan agto piaabobon ed saya nen biglan akatonda.
"Manliliket kayo, kakaaro, manliliket kayo!" kuay sakey a tubonbalon sinmabin maningal a nilalakap to ran amin.
"Manliliket kayo kakaaro! Magnayon komon a manbilay so salitay kastila!”
Tipak ya andi pandenglan so angawat nian balita; nanlalakapan ira, ya akaterter so lua ran amin. Bukor labat nen Pekson so manimimis nin siansiay nantarok na ag pananisia.
