Samay sinmabi ya nanawit na onman lan abig na balita, si Makaraig, tubonbalo ya angipangulon man a kanunotan.
Sayan estudiante manaayam met ed saman ya abong ya aabangan ton panaayaman ton bukor so duaran silir ya susto ed kagawaan iran mabmabli tan mararakep, tan iba toy ugaw to tan kotsiro to ya mangaasikasoy luganan ton tatawagey "araña" tan saray kabayo to. Sakey yan balolakin nagnap ed indengan, maong a mitoo, postura, maong a mangawes, tan sankayamanan. Anggaman manaaral a manabogado pian makala labat na título to ta agto man nakaukolay onanap, nababalitan maseet a manaral, tan no nipaakar ed pisusupia. tan ed filosofia, unong ed kabat day totoo ran inmona, anggapoy nepeg ton ibegan ed anggan siopad saray nababantog ed sayan kakabatan dimad panaaralan ton Universidad. Agmet balet natitilak ed balo ran onkukurang a kanunotan, ta manlapod walaan mankakanawnawan mansasaliw na liblibro tan magazine ira ed onkukurang a panaon a napapalbot iran sians an onloloob diad Pilipinas, anggaman ontan lay elet dan kuan na manbabantay na agda komon dia pakaloob. Nisesengeg ed sarayan walad sikato tan ompano ni kababantog ton masulong tan mabayani, saray inletaw ton impanalo ed impi-arnis may impisepakan to ra nen kabalbalolakí to ni, say pitotoo ton lawas magalang tan dakep na pisasalita may panangidayew tod saray bibii, ag pankelawan a baleg so pakayari tod saray ibiba to, ya pinilí ran pangulo ya mankimey ed pakarapat day sankairapan a gamoran a pilalek da, a sa lanti pangibangat na salitay kastila.
Nen kinmepay daiset so onman lan impangipatnag day liket na linawa ra, ya panangipatnag yan nayarin ibagan alablabas ed saray tubonbalo ta diad kalangueran et marakep lantin ami pakanengneng ed antoman, ginapoan dan inúkit no anto ray agawgawa.
"Natay kabuasan linmaak ed kinen pári Irene" kuanen Makaraig a tono toy singa bilang walay yaamot ton araldalem.
"Vivay pári Irene!" kuay sakey a manaaral ya inkasikasil ed gaway liket to.
______________
1 Luganan ya anlemew ya aliwan yaanap, no agta para saray walaan labat, a sasagoray duaran kabayo. Say manangipapaakar say akankien ta say yarangay koteiro walad beneg.
