"Si pári Irene," kuanen Makaraig ya intuloy, "tinungtong tod siak ya amin so agawa ed Los Baños. Nansusupiátan ira amon katiktikeyan la tay sakey simba, tan sikatoy angiansakit ed sikatayo ya bukor toy angikolarlar ya angiagel ed sikatayo ya kinontra to ra di pári Sibyla, pári Fernandez, pári Salvi, si Kapitan General, si segundo Kabo, si alajeron Simoun...."
"Si alajeron Simoun! kuay sakey; "ya, anto bilang so akibibiangan ton tan a judio ed bengatlan nipaakar ed bansa tayo ey? Ya anta payayamanen tila lantin pansasaliwan....."
"Agka somalabat!" kuan met na sananey a naalipanesan ta mapilit lan mikábat no panoy impanalo nen pári Irene ed saraman a makapataktakut a kabusol.
"Wala nira ingey arum ya atatágey iran empliado ya sungpa ed kanunotan tayo.....si Director na Administrasion, si Gobernador Civil, si intsik Quiroga....."
"Si intsik Quiroga! Si alkaguete ray..
"Agka somalabat, kuanko!"
"Say asumpalan to so ipisok da lawari ra may papiles tayo, ya imermer da la ran ipaugip a pigapigay bulan; maong ingen ta si pári Irene anunotan toy Comision Superior na Instruccion Primaria tan insingbat to ya bangta nipaakar ed pangibangat na salitay kastila, saray papiles manepeg ya ipadalan irad sayan opisina ta diay mangibagay makanan nagawa.....
"Abayag la balet ya ag onkukurang itan ya opisina," kuanen
Pekson.
"Sikatotay inebat dad pári Irene," kuanen Makaraig ya intuloy, "balet ta inkuanto ya lalon abig ta pian nasambot yan pangikukoan lamet na ikurang to; insanto met sinambot so inkiwalad man nen Don Custodio, ta sakey ya lantid saray kalamanan to nian Comision, ya inbagan diad saman a dílin bekta et manuró ray sakey a togiop a mangasikaso, tan manlapod kabat lay sipor a kulí nen Don Custodio, tinoró ran tampol a sikatoy mangaral tan mangiter na tutol, kanian natan walad lima to. Insan si Don Custodio insipan ton sumpalen tod loob na sakey bulan."
"Vivay Don Custodio!"
"No detdetan balet nen Don Custodio ey?" kuay tepet ngola nen makulang na ilalon Pekson.
