Agya sinmebang ed uló ra ta singa lara abuek ed kaisipan a samay kanunotan da et matintinunos lay kurang ton agla nipireg. Ninengneng day Makaraig no anto kasi gaween to no nagawa ya.
"Ontan met so imbagak ed kinen pári Irene, balet ta inkuan tod siak ya imis to ngolay araldalem: "Dakdakel lay agawaan tayo, agamoran tilan say kanunotan tayo et agda naabala ya maganó lan natutolan, kanian saray kakabusol tayora napasout iran omparungtal a miarapan.....No napagampi tayo labat lad sikatayoy Don Custodio ta pian diad panumbok toy panagnunot to ran liberal, et makapaabig ed sikatayoy iter ton tutol, análo itila. Si General impatnag ton mamepegley ya anggapoy pipilaan to."
Tinmonday Makaraig.
- "Antoy gaween pian onggampid sikatayoy Don Custodio
ey?" kuay tepet na sakey a maganat lan agla makaalagar.
- "Walaray duaran nayarin gaween ya imbagá nen pári Irene
ed siak.....
- "Si intsik Quiroga!" kuay sakey.
- "Ja! Maong no asikasoen toy Quiroga..
- "Rigaloan!"
- "Lalon makapauges ta ikikinon to tay ag napalkapan."
- "Ah, amtak la!" kuanen Pekson ya manelek; "si Pepay
a bailarina."
"Satan! Si Pepay a bailarina!" kuay pigara. Sayay Pepay sakey a malanguer nin marikit a mankañang a mangawes ya ibábaga ran amigan maong nen Don Custodio; sikatoy panpepeketan day kontratista, saray empliados saray totoon masilib, no walay labay dan kerewen ed sayan balitadon concejal. Si Juanito Pelaez ta amiga to met imay bailarina, pinmarungtal a sikato lay akauley a mangiba pian naganoan iman ya asunto, et pinmeyeng si Isagani tan kuanton masulosulok lay impangikana rad pári Irene tan diad pakaisip to alablabas met la no pati si Pepay lamet so pibibiang dad saman ya asunto.
"Nengnengen pa no anto tay sakey a nayari nin gaween!"
