"Say sakey ni say isingger ed kinen abogado Pasta ta sikatoy panangipanonan nen Don Custodio tan anggapoy ibaga ton agto nia sisiaen tan tuloken."
"Gabgabay ko ni tan," kuay Isagani; "si sinyor Pasta pilipino, insan kaaralan di pangamaen ko. Panon balet so gaween piano onggampid sikatayo ey?"
"Sikatotan natan so kawalaay gatá," kuay ebat nen Makaraig ya sankanengneng ton ag alisay matáy Isagani; "si sinyor Pasta walay bailarina to....ay, antoman,....walay managbor da to.....
Pinmeyeng lamet si Isagani.
"Nalalabas kayo met lan puritano,"1 kuanen Juanito Pelaez ed sikato; "dapot maong so tatakpanen, akauley la tay ikanad pakagamor! Kabat ko tay managborda, say ngaran to Matea, walay panagdaitan ton pankikimeyan day akamayamay a tubonbalon mamarikit....."
"Aleg, sinyores," kuanen Isaganin agto pinasumpal; "onaen ti ni ray maabig a pangidalanan.....Onlaak ed abong nen sinyor Pasta, tan no anggapoy nagamoran ko.... nayarian yo ian gaweey labay yo ed saratay bailarina tan managborda."
Apasout iran inmabubon ed saya, tan apaabig da ya saman ya agew onla lay Isagani ed kinen sinyor Pasta, tan dia lad Universidad, no ngarem, so pangibagaan tod saray ibiba to na kasumpalay pisalita to.
_____________
1 Panangingaran da ya ed Inglaterra ed saramay protestante ya masiado ran malet ed pananumpal daray ganggay religion da.
