Linmay Isagani ed abong nen abogado, ya sakey yad saray matudion impanguló ed Ibale ya sikatoy panangipanonan day papári no wala ray ankabaleg a sakit na uló ra ya kapagaan da. Nanalagar na daiset ta wala laray akaonan kliente ya wadman, balet ta asabin siansiay turno to tan pinaloob dad bufete, ta oniay pananawag day opisinay abogado ed Pilipinas. Kaloob to, sinmigam si abogado ya pinasekiapan toy matá ed salí, balet ta ag inmalagey tan agto met pinayurong tan intuloy toy pansusulat to. Diad onia nankanawnaway Isaganin angimanod sikato, tan anengneng ton samay abogado tinmatken a maong, amalakpak lay buek to tan duldolan la lawarin sigpot so toktok to. Akakuliseng tan masebeg ya impanlupa.
Makenekeneng ya anggapoy kitakitaw dimad opisina; say napapatipatan labat say esaesan daray eskrebiente dimad biek a silir tan say kalasakas na pluma daran bagoy manok a singara mikokulkol ed dadapoan dan papil.
Asumpal nen abogadon siansia may isusulat to, inggaton toy pluma, tinmanguá, tan nen abirbir toy Isagani, linmiwaway lupa to tan pinasamano ton maararo.
"Maabig ya oras so impakakar yo dia! Yurong kayo tan itepel yoak pa la....agko amtan sikayo manayay wadian manaalagar. Antoy itsura di pangamaen yo ey?"
Akaliket si Isagani tan nanilalon maong so kasumpalay pegdat to. Tinungtong tod antikey a salita so nagagawa ya legan ton mansasalita iimanoen ton maong so bunga ray ibabaga to ed kinen katungtong to. Si sinyor Pasta, dinengel ton singa anggapoy wala nen gapó, tan anggaman sinmabí lad layag to raman a pilalek day estudiante, nankonkonwarin agto nira kabat ta pangipatnag ton anggapoy akibibiangan tod saraman ya inougaw a gáwa, balet ta nen sinmabí inap tod labay
dan kerewen ed sikato, tan lalo la nen nangel ton nipaakar ed
