Si abogado ta labay to lantin elewen si tubonbalo na dakdakel tan araralem iran salita, ginapoan toy nandadalatdat na nambabangil iran ganggan ed liblibro tan ontan da met na impapaakseb na ári, ya diad gaway impanlabir to inbis a naelew toy Isagani, sikato la ingen a dili naiweng ed sulsuliwet na imbabaga to.
"Agmin balot gagala ya ipanget mi kayo," kuay ebat nen Isagani ya mareereen; "ilaban kami komoy Dios ed anggan mogmon pakagunagon mid saray totoon ontan lay kanay bilay da ed saray pilipino. Balet ta anggaman ontan lay kakisíray pikakabat kod saray insusulat a ganggan, saray impaakseb na ári, tan amin iray impapaakseb niran tutuntonen diad dálin tin nianakan, agko nasisia ya walay kaugsan a nagawa ed pakatulong ed pakarapat na masuri ran pilalek na Uley, tan panggaway anggaay nayarian ta piano saratan a pilalek et natumbok iran petepeteg; apasakey so tatakpanen a sábien, nandurumaan labat bilang so pangidadalanan."
Akaimis si abogado; si tubonbalo akaarawi lad pegdat to ya nipaliis lan niarawi ed sananey a tungtongan, dimad kanunotan nen abogadon pangelewan ed sikato, ya singa sankanengneng ton naelew la.
"Sikatotan lanti kawalaay quid¹ ya unong na naugaliyan a panangiba: tuan peteg a sankaabigan so panulong ed Uley no tulongan ed loob na katutulok, a tumboken iray pilalek to tan say petepeteg a talus daray totuntonen iran ganggan, a miolop ya ag onkasipá ed sara met so maptek a pakaisip daray manouley tan ag onsumlang ed onaona tan paraparan panag- nunot daray totoon mangaasikaso na lapag a kaabigan na togiop day katoowan. Kaniantin sakey a kasalanan a nayarin dusaen, ta sungpa ed angiletnegay pakauley so pangigapoy sakey a gawan sumlang ed inggapo to nian pakauley, anggano yan ni bilang a mas maong nen say dilin gagaweey Uley, ta sayan nagawa nayarin napaabeba toy atagey a kipapasen a sikatoyay onaonan angiletnegay pakauley day Inan Bansa."
Tan si abogadon masiken, ya alutolutod linawa ton naelew lay Isagani ed karakel tan araralem iran imbaga to, inapiger ton insaral ed panyoryurongan ton silyon a nengneng toy mabinbinta, anggaman manelelek ed dalem.
______________
1 Makasengeg odino makagapo.
