Si Isagani balet inmebat na onia:
"Say inisip ko wari so diad pakatalus day Uley ono bansa ran manouley a kibang-kibang ono walad kaatapay pakauley da, lalon seetan day mananap na mabiskeg a pangiletnegan nian pakauley. Say niletnegay tagey na kipapasen day bansan manouley ed arum iran bansa natan, sankaléteyan ta andi ed lima ra no agta wala ed abig na linawa ray ouleyan legan danian labay a birbiren yan pakauley.....Say pakaisip ko no sayan pakauley et iletneg ed kaptekan odino katunongan lalon. magnayon."
Intangua nen abogado; panon? onaangat iman a tubonbalon onebat ed sikaton misupiatan, sikato ya nababantog a sinyor Pasta? Agni sirin naelew ed araralem iran imbabalikas to?
"Ipolisay yo lara tan a kanunotan ta napno ray kaatapan," kuanen abogadon inmebat ya impeyeng tan inkubibit to. "Say nibagak ed sikayo so paulian yo lay Uley a manggaway nepeg toran asikasoen."
"Inletneg iray Uley a nisesengeg ed kaabigan day onbáley, tan piano nasumpal dayan nabebetangan da ed kanepegan, kapilitan a tumboken day ituró ray mibabáley ta angga po lay ontalonad sikara ya makaamta no anto ray nakaukolan dan díli."
"Saray mangikukurang na Uley mibabaley met ira, tan apalabian niray pakatalus."
"Balet ta manlapod totoo ra, makabos ira tan nayari ran nalingo, kanian ag manepeg ya ag ira ondengel na kanunotan tan pakatalus day arum."
"Nakaukolan ya ipiyad sikara; ta iter da met ya amin so nakaukolan."
"Wala may kuanday kastila ya say ag onakis, ag onsoso. Say ag kerewen sirin ag nagamoran."
"Sa ingay sumlang so nagagawa," kuay ebat nen abogado ya bansag na inelek toy napnoy balaw; "no nipaakar ed Uley say nagagawa sumlang ya aminpinsan......
Insan amemet ya akatonda ya singa bilang alawanan to lay nibagá to, tan diad pamalnot toy inkilawan to, kuanton intuloy:
