"Say Uley impagámor tod sikatayoy nambabangil iran agtayo kinekerew tan agtayo met nayarin kerewen.....ta satay ikerew.....say ikerew singa kabaliksan toy walay kukulangan to, tan no walay kukulangan to, mapatnag ya agto sirin nasusumpal so nabebetangan to.....tan no ipasingayew so pangidalanay pangapiger, no tabien ya itunton, ya anggano aleg lay sungpaen, singa kabaliksan toy ipapasen a nayarin nalingo, tan unong na imbagak lad sikayo saratan a pangipasen, katotongangá lara ed bilay tan pakauley na Inan Bansa..... Saray karaklan agdaya natalusan, tan saray tubonbalo ya marlás so kanunotan da, agda met natebek odino agda labay a tebeken a lalon makapauges so onkerew.....tan say katotongangá ed Uley ya intarok to nian kaisipan....."
"Itepel yoak pa," kuay Isaganin agto apasumpal, ta apasákitan ed panangatunongan ya ikakana nen abogado ed sikato; "no say báley et onkerew ed Uley na bengatla ya ipadalan tod onkukurang iran tutuntonen a ganggan, say makasengeg ta ipapasen ton say Uley et maong tan sipaparaan a mangipagamor ed sikatoy sakey a kaabigan, tan sayan gawa inbis a makapasanok ed Uley, makapaliket komon; ta say naugaliyan onkerew ed ina ya andin balot ed ikit. Say Uley diad magter kon panagnunot, aliwan sakey a pinalsan anggapoy agto amta ya nanengneng tan napasakbayan ton amin, tan anggano yan ni bilang ya onia, agto ipasen ya apasákitan ta nanenengneng yo met a say dilin Ina tin Santa Iglesia anggapo lay gagaween to no ag mankekerew ed Dios ya anta anggapo met so maamot ed Dios ta kabat tan sankanengneng to lantin amin, tan sikayon dili kerew ki met lan kerew na nambabangil ed saray okuman ton tan ya Uley, tan anggad natan agmet ni impasey Dios. ni saray okuman ya apasákitan ira. Walad maptek a pakatalus na amin a too ya say Uley, manlapod kabaliksan toy singa sakey a muyongan na totoo, nakaukolan toy pitutulong day arum, nakaukolan ton walay mangipanengneng tan mangipalikna ed sikato na katuaay nambabangil a nagagawa. Sikayon dildili agyo sisisiaen a petepeteg iratay ibabaga yod siak; sikayon dildíli amta yon peteg a say sakey a Uley nasnaspot, no diad pangipasirayew toy biskeg to tan agto itétewek ed siopaman, et anggapoy yabuloy to manlapod antakut ono mangaatap; tan amta yo met a bukor da labat na bansan ouleyay nasnaspot a
