"Kapkapalduay siglat na kurang na makina, kapkapaldua!" kuanen Donya Victorina ya ag mangitaltalek; "akin ta no iyan so anggaay nayarian to a?"
"No iyan so anggaan to nasabi tayon pansakayan iramay papageyan ay," kuay ebat nen Kapitan ya amagamagá ya impadukey toy bibil ton leksab ya impangituro ran may tatanemay pagey a bansag na impangikindat ton amidua ya matantantan.
Si Donya Victorina dakel so mikabat ed sikato ed bansá nisesengeg ed saray panagnunot tan gawa to ran dumaduma tan makapalpalek. Madagó ed saray punpunsia ya papalabasen tan aánosan day totoo dapot no iba toy kaanakan ton Paulita Gomez, marikit a maong a bii tan mayaman, ulí lan sigpot, kanian si Donya Victorina so mangaasikasod sikato tan manbebenbey bienes to. Matatken lan akiasawa ed sakey a masegsegang a mangaray Tiburcio de Espadaña, tan diad sarayan bekta ya pakanengneng tayo ed sikato, labinlimay taon to lan nankasal, tan mankakanay postison buek, tan mansusulong na kawes iran mialaan ed kawes day bibiin taga Europa, ta sa lantí masimoun a pilalek to say panmaliw ton pipára ed saray bibiin europea, ran nanlapod samay masegsegang ya agew ya impankasal to, diad nambabangil a sinasali ton gawa ran dudusaen, akalkalnaan ton naomay itsura to na ontanla, ya diad sayan oras et anggano mantekep ni Quatrefages tan si Virchow agda amta no iner so pangipasenan dad sikato ed saray kabat lan polí ray totoo. Diad dukey lay linmabas a panaon na impanamong dan sanasawa, samay lakí ya anta inánosan to kalamor ya intepel ton singa panagtepel na fakir¹ so amin a makapasinagem iran kagagawa to tan tinolok ton amin so gusto to, asabí oras ya akuliteptepan, binandabanda ton may tayokor to, ta piley lantí. Ontan lay inkikelawan nen sinyora Joba ed sayan ag ataltalaranan tan ag ililaloan ya impansalat na ugáli nen asawa to, ya agto alikna ran tampol so sakisakit,... tan bukor labat nen linmabas lay inkisegawan to tan akabatik lay asawa to, so impakaliknatoy danedanel na laman to ya nandokol a pigay agew, ya ag nasabsabaay liket nen Paulita ed saya ta labalabay ton lorlureyen tan panelelekan si panginaen
_______________________
1 fakir - Diad India lalaki ra yan masansantos a mipapayabol tan manbibilay ira ed kapobrian.
