kabaliksan day aripen a sinaliw, so anggapoy pankatonungan
dan onkerew na anggan anto ed kapigan man. Say sakey a
báley a bubusolen toy manouley ed sikato, anggapo lay nepeg
ton kerewen no ag say pangikban to nia na pakauley."
Si abogadon masiken manpeyeng a mankuliseng a pakapatnagay agto pakapapaknay narerengel to, tan apaplosen toy
tuktok ton duldolan; insan to inkuan ed tonoy bosis a napnoy
panangasi tan panangiagel:
"Hm!.....mauges ira tan a bangat, makapoy ira tan a kaisipan.....hm! Mapatpatnag a malanguer kini tan anggapo ni naaralan yod bilay! Nengneng yoy nagagawa ray tubonbalo ran agmet nira akaaral ed bilay ya wala ra ed Madrid tan kerew laran kerew dimay nambabangil a pamasimblo ed kurang na Uley dia; nipapasen irayan filibustero ono onsusumlang ed Uley, tan dakel lad sikaray ag lara onmatalek ya ompawil dia. Et no nengnengey tua, anto ray kekerewen da? Bengabengat la ran sankaabigan, ya aliwa met iran balon kanunotan ono pamaakaran ta gendat laran kabat tan anggapo met so amtan kaugsan da..... Wala ra lanti balet so agko nayarin ipaliwawad sikayo, ta ag ira nepeg ya ibebesngaw.....kuan la bilang... Akoen ko ya wala niray arum a makasengeg nen saray imbábagak a makadagdag ed sakey ya Uley a susto ed panagnunot ed pangipaawet ton agto pangiabuloy na saray pirawat na sakey a báley.....andi..... nayari met lantin say abanaan tayo ran manouley et totoo ran makulangkulang, tan makapalpalek, ya agda ninatnat so kanunotan da..... balet wala ran siansiay arum a makasengeg.....anggano say kekerewen et walad katonungan.....saray Uley nandurumay kipapasen da....."
Si masiken manduaruwa, nengnengnengen ton ag alisay matay Isagani, kasalilikna singa walay apaabig ton gaween, tan inandawes toy lima to ya nengneng toy angipulisay na sakey a kanunotan.
"Naparlesan koy labay yon ibaga," kuanen Isaganin manimimis na maerermen; "Say labay yon ibaga so say Uley na Inan Bansa, manlapod dakel so kakulangan to ta kabaliksan to lanti inletneg ya singa panasálian bilang...
"Andi, andi aliwan satan, andi!" kuanen masiken ya agto pinasumpal, tan singa konwarin walay aanapen tod saramay papipapil to; "andi, say labay kon ibaga.....iner tay nakar ton may salming ko?"
