so uló to ta nanaalipanesan ed onman lan karakel na matá tan
palet na osioson ontetereg ed kalimgasan nen inaro to: saraman
a kanenengneng ipapasen toran takew, tan saray imis nen marikit kabaliksan dad liknaan toy kalamangan.
Kanengneng nen Juanitod kinen Paulita, lalon pinatagey toy sipor lan bukot tod beneg, tan angilúgay; inebatan nen Paulitan singa anggapoy walalad sikato; tinawag balet nen Donya Victorina ta sikato lanti kalabian to, ya mas labay to nen si Isagani.
"Agay lay abig ton bii! Agay lay abig ton bii!" Olioliyen nen pári Camorran makalkalna ya liknaan toy arakep.
"Satay eges yoy karut yo, Ama, agyo kami pibibiang!" kuanen Ben Zayb a mauges so uló to.
"Agay lay kalimgasan to, agay lay kalimgasan to!" kuanton umanumanen ya ag naupoupot; "insan say kaaroan to samay eskuilak, samay akitulakan ko."
"Mapalpalar ta aliwan taga báley a pankukuraan ko!" kuanton intuloy ya aminpigan linmingaw a pakpaknuyotan to. Ngalngali tola ran síyanan iramay ibiba to ya ontumbok, tan irap nen Ben Zayb a pinukpokan. Si Paulita manarawi la, balet ta sankanengneng ni marakerakep a diking na lupa to, tan say uló ton makalakalat so inkasagaysay to, tan makaayayat so kagagalaw to.
Saramay tutumboken tayon manpapasiar, intuloy da met so panaakar da, ya ag napukpokan nen pári Camorray panngesngeswá to, tan akasabi rad sakey a tindaan ya aliktob na totoon miron ya impalugar dad sikaran tampol so pasen da.
Sakey yan tindaan a panlalakoay ankekelag a tootoo ran kiew a gawa diad bansá, ya wadman iran nanengneng ed nandurumaan a kinakabaleg tan itsura so ereng, polí tan anapbilay diad sarayan kapoloan, saray indio, kastila, intsik, mestiso, papárin ampoti, papárin andeket, saray empliado, saray kápitan, saray estudiante, saray militar, tan arum ni. Nayarin saray managgawa et malabí linawa ran manbangbang na talintao ray papári ta marakep so pakanengneng dad pilpiligis na ábito ra nen say kawes day arum a totoo, ono lapo lagid makabaliksan a maong so kipapasen day papári ed bansá, kanian walaran lanang ed nunot day managgaway talintao, et anggan dinan lad sarayan duay katuaan say kuestion so mapa-
