"Siopa balet so kapara tonian talintao, Ben Zayb ay ey?"
Insan to inelek nimay kakaelek ton singa elek na kabanyakan.
Saya sakey ya akulaw a bulding, ya aguloguloy buck to tan akalespak ed tablan singa saray dios daran anito na indio nen saman, a manpipirinsay kawes: balibali inkagaway pirinsa to, gansá, say ginagawan ngalab latan pinipitpit a mapmaimpis a kolor na balitok tan say asewek, kapes a maringot ya inlilikewlikew,
"Anto Ben Zayb, aliwan mureng so nannunot nitan, awa?" kuanen pári Camorran manelelek.
"Agko natalusan no antoy labay ton ibaga!"
"Panon, puñales! agyo nabasay impangingaran da ya la prensa pilipina?1 Say ngaray plancha diad bansá prensa odino pirinsa."
Inyan day elek ya amin a pati si dílin Ben Zayb masamsamit to elek to.
Wala met so duaran talintaoy Guardia Civil ya insulat ed leksab day civiles tan wala rad beneg na sakey a toon binalor na malmalet a lubir ya insakbong ed lupa toy sombriro to; say akasulat ed leksab to Say Bansay Abaká, balet ta say pakanengneng singa yakar dan paltogen.
Dakel ed saramay tutumboken tayon pinmasiar diman, agda apaknaan iray nenengnengen. Sasalitaen daray tutuntonen ed arte, anapen day pankakalatan...say kuay sakey ta sayan talintao ay anggapoy pitoran uló to, say lupa to kulang na sakey ya eleng ta taltaloray wala.....si pári Camorra singa sinonunot, ta agto natalusan no akin et say sakey a talintao ta piano sustoy inkagawa to, et nakaukolan ya apatiray eleng to tan pitoray uló to; say kuay sakey met so muskulado ra anta payos iray indio; mansusupiat ira no saraman a tootoo kasi et nibaga ran talintao odino kiew a sinasapsapan labat, etc. Sakey tan sakey, mangibano, mamalaw, tan si pári Camorra, pian ag natilak, sinalsali to met ya imbagan mas maong komon no kapag sakey ya ugawugaw et talomploy salí to. Ta akin a, no saray arum et kakaukolan day pigaran eleng, akin et agto met sirin nayariay mankaukolay dake! a salí ey? Tan diman ira
_______________
1 Say labay ton ibaga say palansa ed Pilipinas. Et nayari met balet ya italus ed "saray palapagan ed Pilipinas."
