Si Ben Zayb pian napakpel to ra may maitatakot, tan pian naseldet to met si Mr. Leeds, inkuanton singa madildíli:
"Ay, Mister, bukbukor tayo met lan lamang dia ay insan aliwa kami met ya indio ya magmainomay a palikdoen, abulo-yan yoak a mangipanengneng ed sarayay ibak ay, no panoy panggagawa yo? Amta mi la ya walad pakanengneng labat, balet manlapod ag manisiay pári Camorra....."
Tan imparaan to lan luksoen imay sában ya agto la ton-tuney pinto; si pári Camorra balet agto akoen so ipapasalita nen Ben Zayb ed sikato ta napapagaan ya agla pigá no tuay ibá-baga to nia.
"Akin et andi, sinyor?" kuay ebat nen amerikano, "balet ta, apiger yo labat pian anggapoy naderal."
Si Ben Zayb wadman lad tagey na entablado.
"Abuloyan yoak?" kuanto.
Agto la inalagar so ebat nen Mr. Leeds ta mapagpagan agya onabuloy, intagey to may panyon akasakbong tan anapen to ray espejon iilaloan ton wadman irad nanlalaetay salí lamisaan. Akaayew si Ben Zayb, akasuner, sinosukasok to lamet imay silong na lamisaan na sanduan lima, ya inwaswasiwas to ra. Anggapoy arumog ni atalapus to. Samay lamisaan taltaloray salí ton balatyang ya akapanek irad man ed tablay entablado.
Lingawlingaw ed biek tan biek si sumusulat ed palapagan a singa walay aanapen to.
"Iner so kawalaan day espejo ey?" kuanen pári Camorra.
Tomakiling si Ben Zayb, karapas lan karapas ed samay lamisaan, itagey to may panyo, insan to apaplosen na lima toy muling to ya singa bilang walay labay ton nanunotan.
"Walay abalang yo?" kuay tepet nen Mr. Leeds.
"Saray espejo, Mr. Iner so kawalaan day espijo ey?"
"Agko amtay kawalaan day espejo yo, saray kienko, wadman irad tinondaan kon hotel..... Akin labay yon nangnengey itsura yo? Ampotipoti lupa yo ya nengneng yoy ataktakot."
Amin day wadman anggaman singa ra nisegawan, akalek ira ed amagamagan panosutil nen amerikano; si Ben Zayb abaingan, pinmawil ed yarongan to ya meremeréy onia:
"Ag nayari; nengneng yo, agto tan nagawaan no anggapo ray ikana ton espejo.....Naani, nakaukolan a salatan to tay lamisaan.....
