"Osioso met iray papári, awa?" kuanton may biin inmarawi la; "agda labay a naamtaan tayon naloko met ira! Akin, kusiang na pári tay uló ay?"
Diad baleg a keneng, intuloy nen amerikanoy nansalita ed bosis ton giwgiwan:
"Sinyoras tan sinyores: diad sakey labat a salita pabilayen ko yan sankaakop a dapol tan nayarian yoy misalita ed sakey a pinalsa ya kabat toy linmabas, dadalanen, tan pen!"
Tan si salamangkero inmingal a matantantan a diad gapo marmaermen insan mankásil ya nansumpalan toy singa nanlalaok a tanol a matobtoibot ya aliling na ayew ed tonoy bosis a pagasan tan mamagiaw, a binmegas so bagó nen Ben Zayb.
"Deremof!" kuanen amerikano.
Saramay kortinan andeket pinmalog ira, kinmuyep iramay lamparaan tan samay lamisaan inmateet. Sakey ya aglém a makalkalnay inmebat ya nanlapod mad dalem na kajon. Nannenengnengan iran amin ya amespesiaw so kalupaan da tan mapagpága ra; sakey ya sinyoran mapalaloy inkataktakot to tan singa walay nalilikas ton ampetapetang ya onaagos ed dalem na kawes to sininkat ton pineketay pári Salví.
Linmukas a bukor imay kajon tan anengneng dan amin so sakey ya ulón nengneng na bangkay a nanbuek na andeket ya andukey tan makapakapal. Samay uló linmimatan nankalkalna tan imparlas to ray matá tod amin day wadman. Sansananey tan mapalaloy kidiam da ya akaloer met la lági inkaliber day asireg a laman tan unong na abyssus abbyssum invocat,1 saraman a matá sankanengneng dan ag alisay nikokundalem met iran matá nen pári Salví, ya saraya et akamoldagat iran maong a singa ra makanenengneng na aniani. Si pári Salvi manggiwgiw.
"Esfinge,"2 kuanen Mr. Leeds, "ibagam ed saray onnenengneng no siopa ka!"
__________________
- 1 Say niaralem ayaten to met so sralen,
- 2 Sakey ya ayep ya panigsisiaan day totoon inmona, uló, beklew tan pagew na bii, kabalgan tan salí leon, insan nanpayak. Walay balbaleg ya ginawan onia ed bukig na komaduan pirámide ed Egipto. Sara balet so sumusulat nipasal dan mabetbet ya ikakana yan salita ya pangibaga ya ag natalusan so walad lupay too. "Lupay esfinge," kuandad satan.
