Keneng, ya anggapon balot sa onkitakitaw. Sinmiplog so dagem ya ambetebetel a pinakilat toy silew da ran may lamparaay inatey. Pati saramay ag manisia akigtot ira.
"Siak si Imuthis," kuay ebat ton may uló ed bosis a singa nanlapod lubok tan mamagiaw; "inanak ak ed panaon nen Amasis tan pinateyak legay impanuley day Persas, nen peles nen Cambyses ya ompapawil ya atalon nanlapod utel na Lybia. Ompapawilak kasumpal kon nanaral tan nanbabaroy ya abayag ed Grecia, Asiria, tan Persia, tan mamapaarap ak lad dálin kon nianakan ya nunot ko lan panayaman anggad panawag ed siak nen Thot ed arap na okuman to. Ginaway selang kon kapalaran ya diad indalan kod Babilonia et akabatan koy sakey a maamot a makapataktakut, say yaamot nen paklap a Smerdis ya anamsam na pakauley, si matalek a magon Gaumata ya manouley ed impakaloko tod saray totoo. Diad pága ton isumpit kod kinen Cambyses, pinaabig toak ya apusan ya ikana to ray papárin Egipcio ed panggawa toy onia. Sarayan papári sikaray manouley ed dálin kon nianakan; kien day duaran kakatloy daldalin cd bansa, bukor day walay kakabátan, tan imemermer da ray katoowan ed kamangmangan tan masulit a uley, panmamaliwen da ran binmaigan ya ekalay liknaan tan kababaingan, piano maraldalatoy katotulok dad siopaman ya manuley ed sikara. Saray linmoob ya anamsam na uley ikakana da ra yan papári ed pakagamor da ray pilalek da, tan lapod amta da ran makaná, tutulongan tan payayamanen da ra, ya asumpalan day manouley so aliwa labat lan tuloktulok ed sarayan papári, no agta asabisabin singa da ra labat ikakanan ipaarap ed labay dan pamaakaran. Sarayan papárin Egipcio tampol ya tinolok day ganggan nen Gautama, lalo la nimet ta tatakutan daak ta ompano ipaway kon iparungtal ed báley iray tilatila ra. Diad pakagamor dad panderal dad siak, sinambot day dalang tan posapos na liknaan na sakey a malanguer nin pári ed Abydos a nipapásen a masantos!...."
Makaparpaermen a keneng so tinmonbok ed sarayan balikás. Saman ya uló sasalitaan to ray makilot iran gawa tan panaglóko ray papári, tan anggaman say sasalitaen to et linmabas la ran panaon tan dumá ran pananisia, napipika ramay papárin wadman tan maalipanes ira lapo lágid nanenengneng day piparparay aalutoren ton totungtongen nimay uló ed nagagawa
