pári ta amtak lan maosi cleng mon singa si amam ya agto nayariay mangay queso na Europa..... balet ta nepeg tayoy man
tepel, ag onesel, onabubon ed amin.... Ta, antoy nagawaan
tayo ey? Saray papári walad sikaran amin; no anggapoy abuloy da anggapoy makapaway ya abogado ono médiko.... Man
ános ka, anako, man ános ka!"
"Alablabas lay impan ános ko, ina; nantepel ak ya andukey a bulan!"
Ag siansia ontundan mantagtagleey si Anakbanwn Andang. Inkuanto ta agto met kekerewen ed anak to ya onggampid saray papári, ta sikaton díli agmet milad sikara; masulosulok so pakapikabat to ya kapag sakey a maong a pári et wala ray samploran mauges ya opoten day kuarta ray mairap tan ipaalis daray mangayaman. Balet ta nakaukolay ag onesel, manirap tan mantepel; anggapoy arum a dalan to. Insan bitbitlaen toy ontan tan si ontan a too, ya nisesengeg ed ipapatnag ton ános tan kaabebay linawa, ya anggano diad utel na puso et kainglit toray ámo to, et asabi toy piskal ed okuman anta impaugaw ed pári labat; tan si ontan met a too ya natan et mayaman tan nayarian toy manggaway anggan anton kaugsan ta amta ton andi saew ya nilaban day padrino ton ag nadusa, anta nen saman et sakey labat a dukán sakristan a maoyamo tan matulok, ya angasaway sakey a magangganan marikit tan inanak nen kúra ed biniag so anak to.....
Dinadalatdat nen Anakbanwan Andang ya ag napultot iray amin a pilipinon maoyamo tan maános unong na panangibága to, tan gapoan to lan itombok ira balet iramay nisesengeg ed kakulangan day ános tan tagey na linawa ra et nipaalis ira tan napapaunong tan nasisigensigen ira, nen nanbaraan si Plácidoy bengatlan andi kakabaliksan tan inmakseb a nanligawligaw ed kalansanganan.
Nilibot toy lansangay Sibakong,1 Tondo, San Nicolas, Santo Cristo, ya nalilibang tan mauges so uló to ya agto aasikasoey petang na agew tan oras ya onlalabas, tan bukor labat nen alikna toy erás to insan anggapoy narumog ton kuarta to ta iniiter to manayan amin ya inousós, insan sinmenpet ed abong. Inilaloan ton agto la nasabian si ina to ta naugaliyan to niay no onla diad Ibale, diad saman ya oras wala lad sakey ed saray kaabay
_____________________
1 Netan lansangay Tetuan, Sta. Cruz.
