napaliisan daray loak, tan no arum onyukó ran onusok irad korakoral ya aliliway inkagawa ra tan nadederal lara. Mankelaw si
Plácido cd pakanengneng tod kinen alajero ya amta toy labotlaboten tod saraman a pasen a singa pasapasal to lay ondadalan
diman. Asabi ran siansiay sakey a solar a baleg a kawalaay sakey ya alolung a nagagaygay tan nibukbukor ed utel na kapontiyan tan sengesengeg na buá. Diad impakanengneng nen Plácidoy baléy iran kawayan tan tubotubong, anginap a wala rad
abong na managgaway koitis.
Tinmoktok si Simoun ed dorongawan tan tinmandag so sakey a lakí.
"Ah, sinyor!....." kuanto, tan tampol ya inmakseb.
"Wadia lay polbora?" tinepet nen Simoun.
"On, inlulugan irad sako; aalagden ko ray cartucho ya pangikargaan!"
"Saray bomba ey?"
Sipaparaan la ra."
"Maong sirin, maestro..... Pikal kayod sayan lábi tan misa lita kayod kinen teniente tan si kábo..... insan ituloy yoy kurang yon andi abala; diad Lamayan nasabi yoy sakey a lakí ed balutó; bitla yoy "Anakbanwa" tan yebat toy "Tales." Nakaukolan a wadia nabuas. Sasambotey oras!"
Tan initdan toy pigaran kuartan balitok.
"Akin sinyor?" kuay tepet ton may lakí ed makmaktek a kastila; "wala siri balon balita?"
"On, nagawa ed loob to niay arapen a simba."
"Sayay arapen a simba!" kuanton may toon akasuner; "saray barbario kulang niray paraan, maniilalo nira ya babawiyen nen Kapitan General so impaakseb a ganggan....say inisip ko lawari so alagarey iloob na Mablin Agew!"
Pinmeyeng si Simoun.
"Agtayo ra nakaukolay barbario," kuanto; saray totoo nen Anakbanwan Tales, saray karabinero a nanpapasó la tan sakey a regimento, masarasarag la. No ipamáya tini ompano ompatey lay Maria Clara! Pikal kilan tampol!"
Sinmelek lamay tood dorongawan. Si Plácido manbanbantay tan nangel ton ami salitaan da; nen atalusan toy nagagawa binmegas so bagó to tan sankanengneng toy Simoun a napno takut iray mata to. Saya makakaimis.
