"Pankelawan yo." kuanton imis toy amagamagá, "ya sakey ya indion dagdaan so kawes to et maong a mangastila? Sakey yan maestro ed eskuilaan nen saman ya ipapasout to kalamor so pangibangat toy salitay kastila ed saray ugugaw, tan ag tinmonda anggad agda inekal ed anapan to tan impaalis da, ta impasen dan managguloy kareenay kalapagan, tan nisengeg met ed impikaaro tod kinen masegsegang ya Ibarra. Inalak dimad angipaalisan dad sikato ya say panbibilayan to kalamor et managbunot na niog tan impanaral kon manggaway koitis."
Pinmawil irad lansangan tan nanakar iran amaarap ed Trozo. Diad arap na sakey ya abong a melag a tinabla ya nengneng toy malinis tan maligliga, akayurong so sakey a kastilan akapapeg iray lima tod sakey a tayokor a manpapayapayan sinsindagay bulan. Dinagó nen Simoun tan kanengneng nen kastila ed sikato inánosan toy inmalagey a bansag na impakaaglem to.
- "Manparaan kila!" kuanen Simoun.
- "Sipaparaanak a naynay!"
- "Diad sayay arapen a simba!"
- "La?"
- "Diad katanol na kanyon!"
Tan inmarawi lan tomtumboken nen Plácido ya gagapoan tola nian tetepeten ed inkasikaton dili no kasi ta ag mankokugip.
"Mankelaw kayo," kuay tepet nen Simoun, "ed pakanengneng yoy sakey a kastilan malanguer ni ya atanek na sakisakit? Nen katangtaon a sakey mabisbiskeg a singa sikayo natan, balet ta saray kakabusol to agamoran day kiakar tod Balábak a mankimey ed sakey a pangawan tan diman to nalay reuma to tan inalaria ton pawilpawil a mangiaarap ed sikatod lubok. Ta anto ey, sayan masegsegang angasaway malimgas a bii...."
Pinatonda nen Simoun so onlalabas a luganan ya anggapoy lugan to, sinmapat ira nen Plácido tan impayakar ed abong to ed lansangay Escolta. Diad saman peles ya ontotugtog ed reloj ray kasimbaanan so a las diez y media.
Duay oras nen Plácidod man ed abong nen Simoun, tan nen onsipot mabinbintan sinonunot a nanakar ed Escolta ya diad saman a oras et anggapo la lawari nanengneng a too, anggaman maliwliwawa tan masaysayaksak ni ray panagkapiyan. No maminsan wala niray sansakey a labaslábas a luganan a
