pinasian makmakbaw so kalarakar na dalig dan ondadalan dimad anosnosnosan lan dampay na lansangan.
Si Simoun balet wadman ed silir ton bandad ilog na Pasig ya akaarap dimad siudad a niliktob na padir a sankanengneng dimad dorongawan iran akalukas, a malinlinew iran namumuria toy atep na abong iran hierro ya manesiab ed liwaway bulan, tan saray tori ray simbaan a nengneng day maerermen, tan ambelabelat ed onman lan deey kaitlekay lábi. Inekal to may salming ton inanágan, tan samay buek ton ampotin singa pinakpak a pilak ya akaliber ed ambelabelat a lupa ton singa atektek ed agew, a samsamet naliliwawaan na makuykuyep a silew na sakey a lamparaan a ngalngali lan naerep ta samsamet lay petróleo to. Si Simoun a nengneng toy naguguloy isip toy sakey a kanunotan, agto nanaimano ya mankuyep lan maong imay lamparaan tan ambilbilunget lad man ed silir.
"Diad loob na pigay agew," kuanton makalkalna, no man darlang lad nantotopag iran diking to tan ya inayew a siudad ya ayamay andi kabaliksan a pasirayew tan andi panangasin pamepespes ed saray ag akaaral tan masegsegang; no onterak so guló ed saray barrio tan onloob iran kibulubol ed sitatakut iran kalansanganan so totook iran ombalés ya alimbaway pinalsa ray mapalalon agap na linawa tan ag nabilang a lingo, gebaen koy padir day pangawan mo, samsamen takad gamet day alablabas a pananisia, tan manmaliw ka, ampotin malapati, ya singa sakey a Fénix1 ya onoli kan ombilay ed makaatong a dapol mon dili.....! Sakey ya inalsan sungpad Uley ya imparaan day totoo ed liputan, so angiarawid siak ed diking mo; sananey met ya iyalsa so mangipulang ed siak ed saray taklay mo, tan mamaulid siak ed bilay, tan satan a bulan, kasakbayay pansulaw to, sindagan toy Pilipinas a malimlimgas ya apalinay makarimdimla ran makarurutak ed sikato!"
Biglan tinmonday Simoun a singa agagá. Sakey a bosis a manlalapod konsiensia ton díli singa to tetepeten no kasi ta sikato et agmet akilan akilaok ed saman a makarimdimlan dutak a mamapauges ed saman ya inayew a siudad, ompan lági no sikato ni ingen so manonaan a mangiiter tan mamapaganoy
_______________________
1 Sakey a bantog a nidumadumad karakpan a manok a kukuanen a saksakey diad tapew na dalin, tan diad ipatey to et onolid bilay a manlapad dapol ton dili.
