"Tan sayan bansá aminpigá lan inmalsa," kuanton may dominiko ya singa nasisikig; "diad saramay panaon a papasouten iray totoon manolor na ankakabaleg iran kiew a gagaween a bapor;1 no anggapo ra labat so papári....."
"Linmabas la ra man a panaon," kuay ebat nen Simoun ya elek toy lalon amagamagá nen say naugaliyan ton kakaelek; "sarayan kapoloan agla ra ontongangan balot anggano anto ni tay belat na kimcy tan buis ya ipasakbat ed sikara..... Agyo ta idadayew ed siak, pári Salvi," kuanton inmarap ed samay pransiskanon mabeng, "so abong tan hospital ed Los Baños a kawalaan natan nen Sankatageyan a Kapitan General?"
Tinmanger si pári Salvi tan ninengneng to ya singa nikelawan ed saman a tepet.
"Akin agyo imbagad siak a saray nankimey ya angipaalagey niran man a dua et saray totood binaleybáley a pinasout iran nantrabajo ya inantabay na lewet na sakey ya oldog? Anganko samay Puente del Capricho ontan met so inkipaalagey to! Tan ibaga yo pad siak, inmalsá ta ra man a balbáley?"
"Agyo balet napaandi....ya wala lay inalsá ra kasakbayan natan," kuanen dominiko; "tan ab actu ad posse valet illatio!"³ "Anggapo la tan!" kuanen Simoun ya amaarap dimad takayan ya imbotbot a lalasoran; "say imbagá, imbaga la. Tan ontan yo met, pári Sibyla, agkayo la mansasalsalitay latin may kalokoan. Anto sirin so kakanaan yon papárin ampoti ey no nayariay báley so ontongangan onalsa?"4
Tan si Simoun inmakseb lad man ed takayan a melag ya agto la inasikasoy ebat da tan arum niran imbabaga ra
___________________
1 Nairapan iran maong so indios ya aliwa labat lan diad impankikimey ed panaggaway bapor no agta antan met ed panangipaalagey na makasamben ed saray kakabusol, panaggaway lansangan, etc. Ontan man ag ira tinmonganga tan no bilang walaray impangipatnag day kasusumlang da, agawa raya ed kidadalan ya ag angiter na paga ed saray walad pakayari.
2 Oldog so pananawag ed saramay nanaral a manpári ya akaábito met ira balet ta ag ira makapanmisa ta diad kapoy na uló ra et agda nasumpal ya amin so aaralen day manpári.
3 No agawa la nayarin nagawa lamet.
4 Say ibabaga ran lanang na papárin ampoti nen saman so matulok tan mapeket so linawa ray indio ed España nisesengeg labat ed sikara. Anengneng balet ed rebolusion na 1896 ya say katuaan so sikara manayay maksil ya akasengeg no ag ingen sikaran buker. ed inalsa ray pilipino a tin mengangan ed Uley na España. Nanlapad 1898 ya anggad natan. dakdakel iray pilipino a seselengen ya angipatua ed liblibro, palapagan, tan arum ni ran sulsulat da, ya say agawan rebolusion aliwan intongangá ed Inan España ya aaroen day pilipino, no agta kototonganga ed saray papárin ampoti ta ng da la naanosan a nitepel so duksa rania.
