Saman a lábi walay marakerakep a paway ed Teatro Variedades. Say compañia na opereta francesa ya kienen Mr. Jouy ononaona man a pangipaway toy Les Cloches de Corneville1 tan iparungtal tod matá ray karaklan iray pumapaway to ya pigay agew lan mandinayew iray palapagan ed abig dan ompaway. Kuay balbalita ta walarad saray bibiin pumapaway so marakerakep so pananganta ra, balet ta lalon marakep ni inkalaman tan indengan da, tan no sisiaen ni ingen iray taltalabutob et say abig na pitotoo ra daegen to ni bosis tan indengan da.
A las siete y mediay lábi anggapo lay nasaliw a ticket ya anggano para si dildílin nengneng na manpapanabos a pári Salví, tan saray manaalagar na pakaloob dad entrada general andukedukey lay pila ra. Dimad lakoay ticket dakdakel so guló, walaray mankokulkol, akalkalamit ya asalsalitay filibusterismo² tan say nanduruman polí ray totoo, et anggapon siansiay akalay ticket. Kasabí a las ocho tan labinliman minutos, wala laray manlalakoy ticket a panutuboan dan maong. Say kanengnengan ton may teatro ya makapulag ed liwawa tan pinaparakep na tamtanaman tan rosrosas ed amin day pinto, kababagelan day onsasabi ni ya mapalaloy pandinayew da tan mantipak ni ray arum.
Manleluag so dakdakel a tood kaliberliber a sankanengneng da ran makakaibeg irad saramay makatutubong la ya anaksakbay iran sinmabí ta mapaga laran nasalin irad yurongan da; elek, esaesan, tan pantatalaray bengat lan nagawa, so nanenengneng da ran may kasabisabí ra, ya mapalaloy irap na linawa ra ta anggapo lay ilalo ran makaloob, tan akitipon la
___________________
1 Saray Kampanay Corneville.
2 Kasosungpa ed Uley na kastila tan pilalek a pisiyan ed España.-219-
