Samay masiken kasonisoniyan to. Melag, melamelanting, akasombriroy atagey a diad inkanosnusan to et nengneng to lay akaalagey a balbaleg a bigis a nanburó, ngalngalin agmo naalmoy kawalaay laman to ed amerikana ton nanikol a malakolakob tan andukerukey, insan akapaway iray salí to balet ed leksab na pantalon ton katangkatang ya anganggad bitking. Samay laman to singa bilang laki, tan ápo ra may salí to, no osdongan ira balet so sapatos to singa altoy mansásakay ed amagan dálin.....ta ankakabaleg iran sapatos na marinero ya ag iran balot onkalat ed samay sombrito ton singa bigis a binmegás iray buró to, ya singa ag itukoy na pangipasey Exposicion day Kabansaan ed abay na konbinto. No panoy balangá nen Urang ya Insanglil, ontan met so inkakayumanggi to; no saman ay et anggapoy bagod lupa to anta kastila, saya, anta indio nanbalbas ya anggad diking na lupa to tan nanbigoti amalakpak ya andukedukey, anggaman malasay. Mabilabilay iray matá to. Say pananawag day totood sikato Tio Kiko, tan kapara toy kaaro to ya manbibilay met ed panangibuyak na balbalita, salambengat ta say gawá to balet mangipaamta na ipapáway tan managpeket na kartel na sarsuila. Bukbukor to angankoy pilipino ya napapalabas ya akarakar ya akasombriroy anosnusan tan nanamerikanay nanikol a singa met si kaaro to ya sikatoy inmonaonan kastilan elekelekan ton ag italtalek so atagey a kipapasey poli to.
"Maong a manbayar si francés," kuanen masiken a makakaimis ya akapaway iray ngares ton singara nengneng na lansangan a karkayarin dinalay poul. "Maong so impakalmok ed impanpepeket ko ray kartel."
Sinintak lamet nen Urang ya Insanglil iray abalá to.
"Kiko," kuantod bosis ton araldalem, "no binayaran da kay anem pisos ed impankimey mo, pigá kasi inter dad saray papári?"
Tinmanguan biglay Tio Kiko.
"Saray papári?"
"Onaa ta nepeg mon amtaen," kuanen Urang ya Insanglil ya intuloy. "ya say akasengeg na onia lan karakel na toon wadian onnengneng saray konbinto."
Say katuaan so saray papári ya impangulo ra nen pári Salví tan pigaran totoo ya impangulo met ira nen Don Custodio, sinmungpa ra ed sarayan klasi ipapáway. Si pári Camorra ta
