Si Urang ya Insangli ya nengneng toy singa unong lawas ya anggapoy walawalad sikatod antoman a nagagawa, atilak nin akarakar ed biek ya isagarsagar to may salí ton mataltalker tan nengneng toy makatetemeg. Atawag so imáno tod insabi pigaran kataon bálo ran lupa ya nanlapo rad nagsisananey a pasen, insan ira nankikindatan a mansigam. Saman to labat anengneng iraman a totoo ed onia ran walay ipapaway, ya anta kabat ton amin so lupa ray manaayam ed dinan man kipapasen ed siudad. Lalakí ran ambilbilunget so lupa ra, midio bukot irad beneg, piripirí ran aliway kagagalaw da, ya singa saman labat so impansulong day amerikana. Inbis ya onla rad arap pian makanengneng iran maong, pilipiliyen da ray ambilunget a pasen a singa agda labay so panengneng.
"Polis iran sekreta raya kasi odino mamatakew irá?" kuanen Urang ya Insanglil ed sikaton dili, insan sinintak to ngolan tampol iray abalá to; "anto bilang so walad siak ey?"
Say parol na sakey a luganan a nitanla asilewan toy polok na apatirá ono limara ed sarayan totoo ya misasalita ra ed sakey met a nengneng toy militar.
"Kuanko la ta polis iran sekreta! Bálo ra anganko!" kuanton inmeremeré ya bansag na sintak na abalá to ngola.
Balet ta naimano ton samay militar kayari ton nanbabáles ya akisalitaay duara ono taloran polok, inmasingger ed sakey a luganan tan singa mamaspasián mitotungtong ed samay toon walad dalem. Sinmingger na daiset si Urang ya Insanglil tan ag nikelawan ed singa impakabirbir ton si alajeron Simoun imay walad dalem na luganan tan naamingaw to met so onian tungtongan:
"Say sinyal sakey a paltog!"
"On, sinyor."
"Agkayo mapága, ta si General so akangganggan; balet ta agyo ya ibábaga. No tuloken yoy amin a bilin ko, ontagey so kipapasenyo."
"On, sinyor."
"Manparaan kayo, sirin!"
Tinmonda may mansásalita tan kinmurang lay luganan. Anta onmanlan singa anggapoy walawalad sikato, agton siansia apokpokan nen Urang ya Insanglil so impakameremeré toy:
