Masaysayaksak so kanengnengay teatro. Napnoy toon manlapod tagey ya anggad leksab, tan dimad entrada general, diad daladalan, dakdakel laray manalalagey a mankulandit ira odino ipalpalbot day matá ra ed nanlalaetay bekbeklew tan layalayag day arum. Saray palko ya karaklan ed wadman et bibii, aliling day babakó ran napnoy rosas a saray paypay et singara bulong day karosasan ya ipapalirpalir na mapalpalayupoy a dagem, tan singa sankarengel so angeeng na libolibon bigibigis. Et manlapod walaray rosas a masamsamit so balingit da tan walara met so makaelew, rosas ya samal tan rosas a makaligliwa, ontan met so nagagawad saray babakó ed teatro tayo, ya nandurumaay naangob, sankarengel iray ebatan, tungtongan, salsalita ran makapasakit tan makatenek. Talora ono apatira nin palko so anggapoy too, atrasado man lay oras; anta say impakabat ya igapoy paway et a las ocho y media, a las nueve la ag makagapó ta andi nid may Gobernador General. Saray walad entrada general a nanaupotan la ray ános tan nanaalipanesan la rad panyoryurongan dan seksekan, maguloguló ra, mankansag ira ya ipatok patok da ray baston dad tabla.
"Bum.. bum.. bum! Onlukas la komoy tilón! bum, bum, bum!"
Pati saramay sondalon kakastila ya tatawagey artilleros maguló met ira. Sarayan inngaran nen Ben Zayb na manangalig ed Marte1 kulang da ni yan tanol. Inisip da lágin walarad plaza de toros2 ed España, kanian lúgay dia lúgay dimay gagaween da ed amin a bibiin onlalabas ed petek da, ya idaydayew da ni ra nimet na salsalita ran anggaman diad Madrid ed niaaliling irad mansamiong a bulaklak, no arum singa la ra angob na makaangol a buntonay dutak. Ibelbeliaw
____________________
1 Dios na bakal, unong ed saray griegos tan romanos.
2 Panangipawayay tulot na toro tan say toreador ono matador.
