wa tod saraya, no agta inyurong ton matantantan tan agto lan
balot nilingaw si inaro to. Dengdenglen toy mararákep iran
kanunotan a totungtongen nen Makaraig tan si Sandoval et
singa manlalapo rad arawrawi. Say pakangel tod samay valse
marmaermen ya singa tugtog na inatey, tan say pakanengneng
tod saray totoo singa makulangkulang iran bantiwel tan aminpigan irap ton pinokpukay lua to. Agto la wari alikas so
gulón agawa ed agto yekal ed irongan imay too, patí say insabi
nen Gobernador General agto naimano. Teregtereg iray matá
con akaarap dimad tilon ya angipintaay sakey a maawang tan
balibálin balkon a pinaparakep na kortina ran pilus ya ambalanga ya ososdongan ed petek toy marakep a tanamanan
walaay mansibuag ed tagey a danum. Alay ermen na pakanengneng tod samay balkón tan samay tanamanan! Pakanunotan iran singa burarog so naliliing ed isip to ya aliling na
arawrawin anyiweng na tugtog a nangel ed kaitlekay lábi, kansion bilang ira nen wala nid kaugawan, esaes irad nibukbukor
iran takel, ilog iran ambilbilunget, lábi ran managaag so bulan.
ed gilig na dayat a maawang.....tan si balolakin naskey na
aro, ya ipapasen toy inkasikaton naandiay kapalaran, intangay
to ray mata to kalamor ya innengneng ed bóbida ta pian napokpokan to ray lua ton ag ira onsalmay.
Apaer so panoumameng tod biglan interak na manungol a tipak.
Linmukas la manayay tilón tan wadman irad intabladon nanengneng so malikeliket a kompog na taga uman totood báley na Corneville ya akagorra ray abel tan nansuikos iray ambebelat ya kiew. Anemirá ono pitora angankon bibii so wadmad intablado ya aping tan bibil day amalangad pinta, tan pinapareket na daiset so liberliber day matá ra pian kanengnengan da niay onkabaleg tan lalon mabilabilay, akapaway so taklay da ran amusiak, gamet da ray napnoy brilianten ankarlang tan bitking da ray malilimpek a singara nilálik. Tan legan dan kakantaey salitay Normanda1 ya allez, marches! allez, marchez! imimisan day masamsamit iramay onggugustod sikaran wadman irad butaka, ya ontan lay talatalar dan agdan balot isasanib, ya asabi lan si Don Custodio, kayári ton pinasekiapay matay palkon kawalaan nen Pepay ta ompano wala met so lilimgisen ton iimisan a sananey ya onkakaraw ed sika-
_______________
1 Sakey ya lúyag ed Francia.
