nanggorra met na abel, tan awawey to ray marawal ya ag
mangitaltalek;
"Hein! qui parle de Serpoletté?" kuanton tinepet ed saramay bibin malalábir, a balbalambangan to ran ag mangiter na punget. Tinipakay sakey a lakíd mad butaka, tan inmalig met la ran ami lalakin wadman. Si Serpolette ya mamalbalangbang nin siansia, nilimgis to may onaonan tinmipak ed sikato ya binales toy masamsamit ya imis, ya anengneng iray ankekelag iran ngipen ton singa ra perlas a dineyeng ya inyan ed ambalbalangan kajitan pelus. Tinombok nen Tadeoy matay limgis nen Serpolette tan anengneng toy sakey a lakín nanbigoti impeket, ya eleng toy andukerukey.
"Anto lay kabaglan!" si Irening!" kuanto.
"On," kuanen Sandoval ya inabobonan. "Anengneng kod mad beneg na intablado ya mitotungtong ed saramay bibiin pumapaway."
Say inkagawa so si pári Irene ta mapalaloy liket tod tugtog insan marunong ed salitay francés, imbáki nen pári Salví ed sarsuila ya singa bilang managsiim na religión a mannengneng no walaray ipaway dan makapakasalanan, ono sumlang ed pananisia. Sikatoyay ibábaga to ed saray kabkabat ton makabirbir ed sikato. Tan manlápod maseseg ed pananumpal toy nabebetang anto, kulang to ni panimano ton manlapod aragdawi, labay to ran muriaen so pumapaway ed asingger, kanian akilimog ed polok do ran may mangikisimkisim ed sikara tan saramay atatagey ya inkatoo, ya atubong to lan pati palesan da ray pumapaway a dimay kawalaay baleg a kotengtengan ed bákil a salitay francés, francés na tindaan a kuan, a sarasarag day lumalakon talusan lalo la no say manásaliw et aliwan matawal tan sipaparaan a manbayar na mabli.
Si Serpolette akompog na duaran opisial a maong iran indengan, sakey a mariniro tan sakey met ya abogado, nen apasekiapan toy matay pári Irenen liberliber a tomakiling ya ipapalbot tod amin a sukosukong tan abo-abot imay eleng ton andukerukey, a singa bilang labay ton singoben so amin a bengatlan maamot a nagagawa.
Tinmondan mansasalitay Serpolette, sinilot to ray kirep to insan to ra intagey, sinmangí, insan unong na amta lan bilay
_________________
1 "Hoy, siopad sikayoy mantatalabutob ed Serpolette?"
