bintan ag oneleelek ni ontipatipak, a wadman labat lan akaarap ed intablado, balet ta nengneng toy sananey so kawalaay uló to.
Mairap so linawa nen Paulita tan sinmabi imon to. Anto, walay nanaibegan nen Isagani ed saramay makatuktokson bibiin. pumapaway? Inmugés so uló to ed insebang to nian kaisipan ed nunot to, tan agto nanaasikaso ray pangidadayew nen Donya Victorina ed kinen Juanito. Saya nanalnaala toy galaw to: no arum manpeyeng a singa bilang walay agto napapaknaan, tan ombansag met so pansigam day totoo tan meremerén nantarok na alipanes ed arum a pasen; no maminsan met onimis a nengneng toy apaknaan toy paway, tan manumtumbok met lad satan a tampol so tipak day totoo. Nanaayapan si Donya Victorinad sikato tan asabin sinmebang nid uló toy labay ton piasawaan no nasabisabín ompatey si Don Tiburcio. Ta akin a, amta nen Juanitoy francés si Espadaña agto amta! Tan ginapoan ton sisingisingíyan! Ag balet nanaimano nen Juanitoy inkaumay galagalaw to ta say aasikasoen ton maong samay sakey a komersiantin taga Cataluña tan samay konsul ya suizo, tan say makasengeg ta nangel to ran mantotungtong ed salitay francés, kanian babantayan toy amin a galagalaw na lupara, ya dimay pannenengnengan to no kapigay manepeg a yimis ton tanday apaknaan toy paway, odino ipeyeng ton singa bilang agto agustoan.
Nantutumbokan so paway, nanbabales iray pumapaway, walaray makapalpalek a singa si alguacil tan si Grenicheux, mablin too tan kalemeway dala ran singa si marques tan si Germaine; manpanpandak iray totoo nen tatampalen nen Gaspard si payotin Grenicheux et say atampal to et si mabinbintan alguacil, say intekiab ya inkibantak na buék tonian postiso, tan say pinasian guló tan ingal nen onkapot lay tilon.
"Nakar na cancan ey?" kuanen Tadeo.
Linmukas lamet balet a tamtampol so tilon tan anengneng so tindaan a panangalaan ed saray igaganggan, ya wadmay taloran lusek a pinaparakep na laylay iran ankelag tan angipasakay kartel iran angitatakay servantes, cochers tan domestiques. Ag pinalabas nen Juanitoy okasion, inmarap ed Donya Victorina tan inkuantod bosis a narengel nen Paulita piano manisia la yan petepeteg ed kabat to:
