saray palko ya mangilúgay tan mitungtong a magano ed saray
bibiin kabkabat da, walara met so mantotungtong nipaakar ed
pakaisip dad itsuray paway.
"Anggapoy duarua ya say sankaabigan da si Serpolette," kuay sakey a lakin ipapatnag ton matudión pakatalus.
"Lablabay ko ni Germaine, asimsimbang so kaabigan to."
"Ag balet makakanta!"
"Antoy gaween ko bilang ed bosis to ey?"
"Ay, no say impanlaman, mas labay ko may atagey!"
"Psh!" kuanen Ben Zayb, "anggapoy maong ed sikaran dua, agda amtan duay ompaway!"
Si Ben Zayb linmadman a mangilalaman ed palapagan ya "El Grito de la Integridad," tan say kagagalaw ton singa ag mangitaltalek makapangitatagey ed sikatod matá da ran may totoon napasasarag da lay makapoy.
"Ag makakantay Serpolette, anggapoy nanengneng kon kaabigan nen Germaine, makapoy so tugtog tan anggapoy karakpay entiron paway!" kuanton insungpal a napnoy panlemlemew.
Ta piano nipatnag ton marunong, anggapo lay miparad pangipanengneng ton anggapoy apaknaan to. Sakey ni, dugduaran ticket so impawit nen mangipapaway na sarsuila ed palapagan a pansusulatan to.
Say kukutengtengen da balet ed saramay palko no siopa kasi akankien ed saramay kerán sakey ya anggapo ni akayurong. Talagan, siopa man bilang daegen to la ran amin ta mapatnag lan sikatoy sankaunoran ya onsabí. Agamtay nanlapoan, kinmurang so balitan si Simoun so akankien, tan amin anisia lad saya, ta anggapo ni akanengneng ed sikato, ni dimad butaka, ni diad kawalaay palesan day pumapaway, ni iner man.
"Anengneng ko balet natay ngarem a kaulop toy Mr. Jouy!" kuay sakey.
"Insan, angirigaloy kuentas ed sakey ed saray bibiin pumapaway
"Siopa ey?" kuay pigaran bibiin nanbabansag.
"Samay sankaabigan ed sikara, samay tumtumboken nen Gobernador General na matá!".
____________
1 "Say Manangibelyaw na Kaptekan."
