Si Isagani labay ton talusan no anto kasi ibabaga ran man a matá; sikara may tuan maong a mansalita ya aliwa ran daldal a singa kuanen Sandoval!
"Tan sikayo ta omaanlong kayo ya iimanoen yo lawas so pantutukoyay tanol day salita, tan inkidatak da, ya kipapasen yoy anak day Musas" kuanen Sandoval ya intuloy ya inandawes toy marakerakep so lima to ya singa bilang ilulugay to ray siamiran sanaagin Musa, "natalusan yo, natebek yo kasi no panoy ipaway day omaanlong a makapiampar cd nababantog iran omaanlong tayoran singa sikara di Garcilaso, Herrera, Espronceda, tan Calderon, no say ikana ra et sakey a salitan singa makalarakar tan anggapon balot so samit ton dengelen a singa salitay francés?"
"Ontan man,” kuanen Pekson, "si Victor Hugo... "Si Victor Hugo, amigo Pekson, si Victor Hugo omaanlong ta utang ton linawad España...ta apapaway a petepeteg ya andi duarúa, ya inako ray díli ran francés ya anta ontan lay ibeg tan siblet dad España, ya no si Victor Hugo et matudió tan mabonay kanunotan to, no omaanlong, andi arum a makasengeg no ag say impanugaw tod Madrid ya dimay inmonaonan sinibualan day liknaan to, diman binmonay kanunotan to, diman abóboy puso to tan diman ira tinmoboy sankarakpan a kaisipan to. Insan sakey ni, siopa tay Victor Hugo a? Akin makapirasig ed saray omaanlong tayo ran peles?....."
Apultot so pansasalita to ed insabí nen Makaraig a nengneng toy nalelemay tan ampaipait so imis to. Sankabenbenan toy papil ya inderew ton andi esel ed kinen Sandoval. Binasa to nia:
"Sibong ko: Atantan so insabí sulat mo; ayarik lan imparungtal so apaabig kon gawaen tan naaprobaan la. Ontan man singak aparlesan so kanunotan mo, ta say ginawak ontukoy ed pilalek da ray tutulo ngan mo.
- Say maaron malapatim,
- CUSTODINING"
- Say maaron malapatim,
"Agí, agay lay abig ton too!" kuanen Tadeon akasibeg.
"Eh, akin ey?" kuay tepet nen Sandoval, "anggapoy nanengneng kon makapoy, say pakatalus ko ingen maong!"
