toy abalá to, tan ninengneng to ra may wadman a singa bilang
pangibaga toy "Akanengneng kilay ontan a kasegasegangan?"
"Nayarian min kabaten no anta tay imparungtal yo?" Tan... "Wala manaya!" kuay pigaran nanbalikas a sinmingger iran sipaparaan ya ondengel. Saray kanunotan nen Don Custodio nasasalita ran singa tambal day albolario.
Si Don Custodio agto lawari ibagad sikara no antoman ya imparungtal ton kanunotan ta makababarong nen anggapoy akilad sikato nen tatalabutoben toy Simoun. "No anggapoy kaatapan, labay yoak a mansalita, awa? Et no wala, agkayo onesel?" dagdawit warin inkuanto, balet ta napalabas to la man a balibalin okasion a pakapangipaliwawa to, tan samay kanunotan to, anggaman ag natuloy, maong a siansia no walaray mikabat tan mangidayew.
Kayari ton angisibok ed tagey na asewek ya amidua ono amitlo, tan inmokok insan linmukdan inapipiger to, tinepet tod Ben Zayb a bansag na impanapok tod saya ed olpo:
"Akanengneng kayo lay pato?"
"Anganko.....ta aanopen mira ed libsong," kuay ebat nen Ben Zayb a mankelaw.
"Andi, aliwan saray paton átap so labay kon ibaga, say sasalitaen ko saray paton ámo, saray bobunaten ya iiwiyen ed Pateros tan Pasig. Tan, amta yo no antoy kakanen da?"
Si Ben Zayb, ya anta bukbukor toy ulon mannonunot. agto amta, ta sikato agto maniiwi pato.
"Kosiling, agay kala saló, kosiling," kuanen pári Camorra ya inmebat; "ag nakaukolay indio ya makaamta, masulosulok. lay duaran mata!"
"Sikatotay labay kon ibaga, kosiling!" kuanen Don Custodion inoman ya manwitwitwit na tamuró to: "tan amta yo no iner so pangaalaan da?"
Samay alenleneg ya ulón mannonunot agto met ya amta.
"No abayag kila dia komon a singa siak, amta yon say panangaalaan da et diman ed patalan ed libsong ta dakerakel diman ya akalaoklaok ed buer."
"Saman balet so kanunotan yo ey?"
"Agkayo kari maganat. Nia ay so kanunotan ko: pasouten ko ray binaleybáley ed kaliberliber ya asingger ed samay patalan a manbonat na páto, tan nengneng yo no ag masu-
