San Diego, agla anengneng nen Simoun si Basilio ni si Kapitan
Tiago.
"Antoy itsura nen agmakayari ey?" kuay tepet ton bansag na impangiparlas to ray matá tod silir ya intonda torad saramay maimpis iran libron nantetekep niray bulong da.
"Ngalngalin ag nalikas so parok na puso....mapalaloy kapoy da....insan anggapon balot so ganas dan mangan".... kuanen Basilion makalkalna tan akaimis na maerermen; "masiadoy panaglinget dad palbangon...."
Nen naimano ton sankanengneng nen Simoun iramay liblibron maimpis, pinmagan lukasan to lamet a ituloy imay tungtongan dad man ed takel kanian intuloy toy onia: "Asamalan lan maong so laman da, kanian nayarin ompatey iran biglan anggan anton oras a singa labat tinerakan iray karol....bengabengat lad tan a makasengeg, anggano andi kakabaliksan...say melamelag a segaw nayarin mamatey ed sikara...."
"Singa Pilipinas!" kuanen Simoun ed bosis ya araldalem.
Ag apukpokan nen Basilioy impakakuliseng to, et lapod mapilit a pasakbayan ton baatey pakasalita lamet ed saman ya asunto, singa anggapoy nangel to tan nankuan:
"Say makapakakapoy ed sikara say mabetbet a panagkugip dan ngalngali ran naleplep, say takot....."
"Singa say Uley! kuan lamet nen Simoun.
"Sanen sakey a lábi aliing iran anggapoy silew, tan inisip dan abulag ira; nangguló ran maong, nantagtagleey iran nantatamian daak a pinapabaingan, ya imbaga ran sinukit ko ray matá ra.....Nen nitan ak lan awit koy silew abaluan daak a pári Irene tan tinawag daak na manangilaban da....."
"Singa say Uley a petepeteg!"
"Kalabian," kuanen Basilion intuloy a mantetelektelekan, "binmangon iran anapen day manok dan ibubulang, samay manok dan taloy taon lan inatey, tan apasoutak ya angiter ed sikaray sakey a nganak tan binibendisionan daak ed satan tan insipan dan itdan daak na libolibó....."
Diad saman tinmugtog ed reloj so a las dies y media.
Akigtot si Simoun tan inkuliseng ton pinatonda may tubonbalo,
"Basilio," kuanton makalkalna, "talineng yon maong so ibagak ta sasamboten so oras. Nanengneng ko ya agyo nira
