- Aro, siopa kan bitewen?
Diad kaimbuasan, agew na jueves, pigay oras kasakbayay iselek na agew, manaakar si Isagani ed marakep a pasiaran na Maria Cristina1 ya mamaarap ed Malecon, ta dimay imbaga nen Paulita ed saman a kabuasan a panbanaan da. Anggapoy duarúa nen Isagani ya say salitaen da et say agawa nen lábin imbeneg, tan manlapod nilutoluto to lad linawa ton kereway paliwawa tan agmet maamot ed sikatoy tagey na linawa nen inaro to, singa to la sankanengneng so pansiyan da. Lapod saya, inawit to la kalamor so alenleneg a duaran antitíkey a sulat nen Paulita ed sikato, duaran ankelag a papil ya angikuritan a masigsiglat na pigaran karasig a pigapigay bural tan lingo ed inkasulat, ya anggaman onia et ontan lay panangiatol nen naskey na aron tubonbalo tan lalo ni panamabli tod sikara nen say dílin sulat a pinirmaan nen Safo² bilang odino si Musa ya Polimnia.3
Sayan ayadayari lan ninunot nen Isagani ya lablabayen to lan mansiyan ira nen say namurmuray galang to, tan say malet a pananisia ton maniirap ed panosumpal toy nabebetangan to, siansian agda naamper so maakdon kaermenan ya akalimbos ed sikato, ya makapangililiing ed kanunotan toran may magayaga ran agew, tan lábi ran lalon sankarakpan a panagtungtong da nen Paulita ya esaesan day masamsamit dimad asanibay rosrosas a rejas a balatyang na silungay abong, tungtongan ya andi kakanaan lágid saray arum, balet ta diad sikato et napno ray kabaliksan a singa bukor da labat bilang so manepeg ya asikasoey sankatudioan lan pakatalus na pinalsa. Nonunoten nen Isagani ramay panagpasiar dad feria no lábi ran managaag so bulan,
__________________
1 Pasiaran ya nen panaoy uley na kastila ya asingger ed pasey Luneta natan tan midasigan met ed dayat.
1 Bantog a biin omaanlong a taga Mitilene, Grecia, ya inanak nen taon ya 600 kasakbayay inkianak nen Katawan tin Jesucristo.
1 Diad mitológia, musa na anlong iran ikakanta.
