"Anggapo ni akapangibagad siak ya anggad natan," kuanto, tan ag mantitila, ta say inamotan nen Don Tiburcio lanti diad abong nen pári Florentino ya dilin pangamaen to.
"Ibaga yod sikato ta paanap kod Guardia Civil," kuanen Donya Victorinan napnoy sanok; "bangkay may mabilay, labay kon kabatey kawalaan to..... Palurey kayo tay nakaukolay mamalabas na samploy taon ta pian makapiasaway too!" Nisegawan si Isaganin sankanengneng toy Donya Victorina. Panon, nonunoten toy miasawa lamet? Siopa kasi masegsegang ya apilí to?
"Antoy pakaisip yod kinen Juanito Pelaez?" kuanton tinepet a biglan andi pasantabi.
"Juanito?.....
Agagay Isagani ya agto amtay yebat to; labay to komon ya ibagay amin ya amta ton kaugsan nen Pelaez, balet ta analod puso toy abig na inkawalná, tan indadayew toy katagam to, manlapod katagam to lantí. Apakpaknaan ya nen Donya Victorina ya malikeliket, tan sikaton dili ginapoan to met ya indadayew ed lurem iray kaabigan nen Pelaez ya asabisabin ipiya to lawarin ibagad Isagani sinmabid puso ton balon aro, et abaat ed insabí ton may amiga nen Paulita ya manbagtik, ya angibagan say paypay to nia et atilak a naplag dimad nanlalaetan day batobatod gilig na dayat ed Malecon. Ginagala may nibana, nisesengeg ed saya, akaabay imay marikit ed kinen Donya Victorina tan akapaliis iray daiset a makapantungtong di Isagani tan Paulita. Makaliliket met ingen si Donya Victorina ed sayan inkagawa ta say walad nunot to so no naibaan toy Isagani ya naasawa toy Paulita, natilak lad sikatoy Juanito.
Si Paulita imparaan to lay gaween to. Nen misalamat ed kinen Isagani nankonkonwarin impatnag ton sikatoy apasakitan tan nanbarongbarongan, insan to impabpaabay ya impasiki ya mankelaw ed inkiwalá nen Isaganid man, anta amin a too et walad Luneta, ya pati saramay pumapaway a bibiin francesa.....
"Imbaga yon manbana itayo dia, panoy agko dia yakar....." Sinikayó nen Isagani ta ombabarong lantí.
"Kalabian balet et ni agyo naimanon wadman ak ed sarsuila; sankaimano takayon nanlapod gapó, agyo alisay matá ramay cochers.....
