Asoni papil da; anta linmad may Isaganin onkerew na paliwawa, asumsumpalan to sikatoy mangipapaliwawan mankokuyong tan pinasiay liket to nen pinirdona nen Paulita. Nipaakar ed inakar to nia ed sarsuila manepeg a misalamat ni ingey Isagani, ta linma ta pinasoot nen panginaen to, tan inmabuloy labat ta say ilalo ton pakapinengneng ed sikato. Anggapon balot so walad sikato ed Juanito Pelaez!
"Si panginaen koy makapapaknad sikato!" kuanton manelek a malikeliket.
Panelelekan da ya, tan panliliketan dan pinasiay pankasal nen Pelaez tan si Donya Victorina ya sankanengneng dan singa la asumpal, anggad impakanunot nen Isagani ya mabily ni Don Tiburcio tan oniay imbaga tod inaro to kayari ton impaisipan ya agto italus ed anggan siopa. Insipan met nen Paulita balet ta wala lad nunot ton ibaga tod samay amiga to.
Diad impakatungtong dad Don Tiburcio, asalitay báley nen Isagani ya aliberliber na katakelan tan walad gilig na dayat a manungol a mansikdak ed sengeg na atatagey iran bató.
Sansananey so dalang day mata nen Isagani no say salitaen to et saman ya ag kabkabat a sukong; manbalangay lupa to ed dalang na panangitagey, onggiwgiw a pati bosis to, atagey so tekiab day kaisipan to ta unong na omaanlong lantí, ya masamsamit iran salitan napnoy dalang na linaway ompapaway irad bibil to ya singa bilang mitutuyaw ed inaro to, tan agto apukpokay impangibesngaw toy onia:
"Ah! dimad kabukoran daran man a kapalandeyan, singa anggapoy makapuger ed siak, liknaan koy aliling na bulós a dagem, andi dumak ed liwawa ya andi sebel ton babatakey sansinakoban! Libolibó ran siudad, libolibó ran palasioy andi duaruak ya isalat ed saman a sukong na Pilipinas a niarawi ed saray katoowan, tan makapangiter ed siak na petepeteg a liknaay kawayangan! Diman, diad piarapan kon andi makasanib ed sankapinalsaan, ya andin nanengneng no ag bukor labat na araralem iran ag nagawat na kanunotan a talusan tan say andi anggaan, saray katakelan, say maawang a dayat, nayarian koy mannunot, mansalita, tan mankimey ya singa sakey a toon anggapo ray bibirbiren ton maruksan manouley!"
Bang si Paulita balet diad saman a dalang na linawan nipaakar ed báley a nianakan, dalang na linawan agto natalusan
