Dimad leksab sananey met so nagagawa. Say karaklan ed saray pasajiro akayorong irad banko tan ankelag iran taburiten tabla ed nanlalaetan day malita, kajokajon, bokbuksot, tan opopigan, a kaababay day mákina tan manaspok ya alopaop day ankakabaleg iran kawan luluagay danum tan sonsungapen day apseng na linget, ansit, tan ambangebanget ya angob na larak.
Saray arum nengnengnengen dan andi esel so mansasalat a nalalabasan irán pasen ed pangdel na ilog, sara met so arum mansusugal irá, tan walara met so mantotungtong ya anta onman lan tanol day sadiok, kalarakar na mákina, pansisit na ompapaway ya asewek, ungol na danum a nakikiwal, tan makatelek a mantotondalisan a pasiot na tambuyog. Diad sakey a sukong wadman iran nanbobunton a singara inlusbón bangkay so intsik iran managlako, ya naelew la ra, amespesiaw so lupa ra, akasangi ran mananggatay so ilol da tan naames la ray linget. Pigara labat lan tubonbalo, ya karaklan ed sikaray manaaral ed Ibale, ya mainomay iran nibiig ed kawes da ran amusiak tan kanengnengan dan mapinepineng, so ontatalek a basilbasil a manlapod olin ya anggad dulong ton may bapor tan lokluksoan da ra may bokbuksot tan kajokajon a malikeliket irad arapen dan bakasion. No arum mansasangsangan iran nipaakar ed galaw ton may mákina ya sasalien dan nonunoton iray alinglingoanan da lan inaral dad Física, no arum met liberliber irad abay ton may katayatdang a marikit a kolijiala tan samay marikit met a managlakoy gágalen ya ambalbalanga ray bibil to tan nankuentas na dineyeng a rosas na sampaga, ya nambabangil so yoopitopit dad sikaran makasengeg na pakaimisan da ra nia, odino pansaniban day lupa ray awit
dan paypay.
