mepespes ed sikatayo, no anggapo lay busulan tan inap, say báley
onseet a mankimey, ta diad ontan say pankimey agla makapaabebá,
aliwa lan panangalay linawa, ya singa ipapasakbat ed saray aripen;
say kastilad satan naekal to met lay uges na ugali to ta naandi
laray makapalpalek iran pilalek ton manuley a nasnaspot, tan
diad ontan mantutulongan itayo ed masion a linawa tan maparungtala kagagawa, tan say komersio, say panaggaway nambabangil a kaukolan ed bilay, say panagdalos tan panagpabonay
tamtanaman, saray kakabatan ya aaralen, ombolaslás irad silong
na panangampayay kawayangan tan ganggan iran napnoy kakabatan tan pananimbang a kaolibay day onkukurang ed mabolaslás
ya Inglaterra....."
Manimimis si Paulita, balet to nengneng toy manduarúa, tan manpeyeng.
"Kugip, kugip labat!" kuanton mangeswá; "nangelan ko ya dakel iray kakabusol yo.....Say kuandi panginaen kon Torina ta sayan bansa magnayon konon aripen."
"Onaa ta bantiwel si panginaen mo, insan agto nayariay manbilay no anggapo ray aripen, kanian no anggapo rad sikato natan, pikugip to ra ed arapen, tan no agya nayári, ipasout toran anggan diad kaisipan to labat. Tua ta wala ray kakabusol mi, ag napaandi tulot, balet ta manalo kamin andi saew. Say uley ya abangonan, gaween to lági anggaay nayarian to ed pangigimor to ray pirawat mi, ikana ton ami nanunotan to ed pangimermer toy kawayangan, balet ta tebagen mi rayan amin ed pangikanta min pangibeliaw nia lanlamang a kawayangan, diad samit day kalilimgis yo tan diad pantipak day pinablí yo ran limá! Agka labat mapaga; say tulot mareen; dapot labat no antabayen yo kamin paliketen ya manaral, liingen yod sikami ray atagey tan masuri ran kaisipan, tan pabiskegen yoy linawa min manseseg tan itdan yo kami bayani ed pangipagamor yoy panangaro yo ya pinagkatumang!"
Siansian manimimis si Paulitan may imis ton mairap a talusan, tan nengneng toy sinonunot; akaarap iray matá tod man ed ilog ya ipapatukpatok ton makalkalnay paypay tod aping to.
"Et no anggapoy nagawaan yo ey?" kuay tepet ton singa natatalibaga.
Nilikna nen Isagani yan tepet, sineleng toy inaro to, binenbenan ton makalkalnad lima insan to inkuan:
"Talineng moak: no anggapoy nagawaan mi....."
