- Ya anggapoy ititilak dad
- Lamisaan may yurongan.
"Agak ni akanengneng na onian pasakbay!" kuay Sandoval; "anggapo amoy pananisiad saray polis, anto? Tan agay layan inkagaway anlong! Singa si Don Tiburcion nanmaliw a redondilla,2 duaray salí to, andukey so sakey tan sineldet na duaran tayokor! No nanengneng nen Isagani iregalo to angankod araparapen a pipanginaen to!"
"Nia lay Isagani!" kuay ebat na bosis a nanlapod takayan.
Tan si mapalar a tubonbalo nitan lan tuan malikeliket a tumtumbokey duaran intsik a lakseb ya awit dan impapatatdang ed ankakabaleg iran bandeja so sopera ran manasasewek na ambalbalingit. Akaeyag irad gaway liket dara may wadman.
Andi nid may Juanito Pelaez et manlapod alabás lay oras, inyurong dalan malikeliket. Lawas la nen Juanito so ag onsasabid suston oras.
"No inbis a sikato et si Basilio komoy binagaan tayo," kuanen Tadeo, "mas ni panliliket tayo. Bueken ti komon ta piano napapaway ti ray yaamot to."
"Panon, anta mapasakbay, wala ray yaamot to met sirin?"
"Anto ey!" kuay ebat nen Tadeo, "ya makabaliksan ira nimet! Wala ray agawan ag natalusan a bukor toy makapangipaliwawa.....samay ugaw a naandipat..... samay madre.....
"Sinyores, say pansit lang-lang sikatoy sankaabigan a sopas!" kuanen Makaraig a maningal; "unong na nanengneng yo, Sandoval, dakel so laok to,-oong, urang, arina tan iknol a minasa insan nililigis, sotanjun, tinetegteg a manok tan arum nin agko la nabilang. Isaklang tayo ray pukel a pamagalang ed Don Custodio; nengnengen pa no anto ra kasi napapaway ton kanunotan a nipaakar ed sikara!"
Inarakak daran may akangel ed saya.
"No nakabatan to labat....."
"Manbagtik ya onla dia!" kuanen Sandoval ya intuloy; "mananam yay sopas, anto may ngaran to?"
"Pansit lang-lang, say labay ton ibaga pansit na intsik, pian walay kidumaan to ed pansit ya gawa ti dia."
"Ah! mairap a tandaan. Diad pamagalang kod Don Custo dio biniagan koy sopas a kanunotan!
___________________
2 Anlong ya inapagapag a tonggal sanepat a karasig tan kapag sakey a karasig waloray bekas ono silaba to.
