Apakpaknaan dan amin yan balon ngaran.
"Sinyores," kuanen Makaraig ta sikatoy nanpagaway kanen; "wala ni taloran nengneng na impagawak a kanen tayo! Lumpiay intsik ya say subo to lamay baboy.....
"Isaklang tayod pári Irene!"
"Antoy agawam! Ag makapangay baboy si pári Irene no agto ekaley eleng to!" kuan a makalkalnay sakey a tubonbalon kaabay to ya taga Iloilo.
"Para satan, ekalen to a!"
"Tabtaben so eleng nen pári Irene!" kuandan iningaingal ya amin.
"Galangen tayo, sinyores, galangen tayo!" kuanen Pekson a makapalpalek so itsura ton konwarin mabinbinta.
"Say komatlo tortan alamá....."
"Isaklang itan ed saray papári," kuanton may taga Visayas.
"Ta andi duma rad alamá" kuanen Sandoval ya insumpal.
"Kaabibigan to, insan ingaran tayoy torta ray papári!" Inmalig iran amin ya imbeliaw day: "torta ray papári!"
"Onsungpa ak ed satan ya inunot kod ngaray sakey ed sikara!" kuanen Isagani.
"Onsungpa ak met ya inunot ko balet ed saray alamá." kuanen Tadeon inarom.
"Galangen ira, sinyores, galangen ira!" kuan lamet nen Tadeon imbeliaw a musamusa.
"Say komapat say pansit guisado ya inunot ed.... Uley tan say bansa!"
Nilingaw dan amin si Makaraig.
"Agangganó nin lamang, sinyores," kuanton intuloy, "say alulotlutod isip day totoo so say nanlapoay pansit diad China ono diad Japon, et manlapod ompapaway natan ya agda manaya amta yan kakanen ed saraman a bansá, no ontan sirin pilipino, balet ta saray intsik so marunong a manggisa tan panpipilakan da. Onian petepeteg so nagagawad Uley tan say Pilipinas: singara intsik, et intsik ira may andi, walaray makapangipaliwawan mangakabat iran doktor na Ina Tin Santa Iglesia.Amin a too mangakay pansit ya apakpaknaan dan amin, et ontan man say ipaparungtal da so agda labay tan nadidimlá ra; andi dumay nagagawad bansá tan diad Uley. Panbibilayan iray amin a too, minanabang irad punsia, insan kayari ra, anggapo lay narerengel ya ibabaga ra no ag say sankaugsan
