onsasalambit ed uló to tan saray kanunotan to, et kanepegan to
komoy aliwan maililingoan, balet ta antoy nibagad sikayoy
sakey a toon singa siak a narnarasan ta agni nanalmosal cy?"
"Niay beklew, bayaw!" kuay kaabay to ya dederewan toy beklew na nganak.
"Walay sakey a klasi potaje, sinyores, a kayamanay sakey a báley a nanmaliw la natan a singa tungtong Basilio labat tan namumurmura diad tapew na dálin ya angikalaosan day nara kutsara ray sankasibaan iran totoo ed dapat irad seslekan..." kuanton inturó toy Sandoval a mitutulot a babakunoten toy anawnawet a payak na naganak.
"Tan ontan da met na walad letakan!" kuay ebat nen Sandoval ya inandawes toy kutsara ton angigulis ed dagem na malimpek pian akapila ran ami wadman a mangakan.
"Isebel so onsalabat!"
"Karewen koy abuloy yod pansalitak!"
"Siak onkerew ak na patis!" kuanen Isagani.
"Anda la dia tay lumpiá!"
Onkekerew iran ami lumpiá, tan inyurong la nen Tadeon malikeliket ed impakaukpos tod kompromiso.
Samay lumpián innunot dad pári Irene, makapoy so pinawayan to, tan balbalawen nen Sandoval:
"Masilesileng ed tabad paway insan kababobaboy ed dalem! Awit yo la dia tay komatlo.....satay torta ray papári!"
Agni balet asumpal imay torta; sankarengel so taban mansanitsit ed kawáli. Saramay manaalagar sinambot day naniinom na alak insan da kinerew ya mansalitay Pekson.
Saya angurós a mabinbinta, inmalagey ya irap ton popuk pokay elek ton makapalpalek ya singa elek na makulangkulang, tan inalig toy sakey a nababalitan managsirmon ed saraman a panaon a párin agustino, inggapó toy nansalitay makalkalna ya singa bilang ibabalikas toy lugan na entiron sirmon:
"Si tripa plena laudat Deum, Tripa famelica laudabit fratres; no say pait a naksel et idayew toy Dios, say pait a kababkabab idayew toray papári. Salita rayan imbalikás nen sinyor Custodio ed sangi nen Ben Zayb, palapagan ya El Grito de la Integridad, gáton a komadua, kalokowan a komalasus, limamplo tan pito."
"Inarararok iran agagik ed Jesucristo!"
"Say kaugsan isisibok toy marumsis ya ililinawa to ed mabonabona tan malamlambot iran gilig na baybay na Frailandia,
