Angabkabuasan si Basilion binmangon ya onlad hospital. Indatak to lay gaween to, dalawen toray agmakayari to, onlad Universidad ya pangamta toy panggradua to tan pangawat toy diploma, insan to tuloyey Makaraig ya nipaakar ed gastosen ton manggradua. Agastos to lawarin ami tipon to ed impanundon tod kinen Julí tan impanaliw toy abong a melag napanayaman dan sanláki, tan nababaingan ya oneycy ed kinen Kapitan Tiago, ta ompano ipasen tonian labay to lay miála ed lanang ton isisipan ya ipatawir ed sikato.
Diad katátalibaga tod sarayan kanunotan agto naimanoy pulok daray estudiante ya anta kabkabuasan ni et ompapawil laran nanlapod Intramuros a singa bilang akapotan iray eskuilaan; lalon agto naimanoy nagugulon nengneng day arum, say pantotungtong dan makalkalna, tan say makapappainap a pansisinyasan da. Kanian nen kasabi tod hospital na San Juan de Dios et tinepet day kakaaro to no walay amta ton nipaakar ed sakey a nunong, akaluksó ta anunotan toy imparaan nen Simoun ya abaat labat nisesengeg ed maamot ya inkasugatan nen alajero. Napnoy takot, tan diad ginmanalgal a bosis to, tinepet ton konwarin ag mankabatkabatan:
"Anto, sakey a nunong?" "Asukayan da," kuay sakey ya inmebat, "tan dakel amoy nalalanor."
Ginawa nen Basilioy anggaay nayarian to ya pinukpokay pága to.
"Dakel so nalalanor?" kuanton inúlit a sasalien ton basaen ed matá ray kaarap to no kasí ta walay labay dan ibagá, "siopa ray....?"
"Saray estudiante, akamayamay ya estudiante!"
Agla tinmepet si Basilio ta mapagpagan nasukayan da, kanian imbaraan toray agmakayarin dalawen to tan inmarawi
lad pulok da. Sinabat na sakey a propisor ya sakey ed saray
