mabas et amta toy gaween to, tan sakey met lay pangasikaso
tod amin a nakaukolan ed panlicencia ton médiko. Dinmalan
ed lansangay Legaspi, tinuloy toy lansangay Beaterio tan kasabí
tod pasen ya akikurosan to nia ed lansangay Solana, naimano
ton walan tua angankoy agawan makabaliksan.
Inbis a gendat iran wadman a malikeliket tan masaysayaksak a pulok day totoo, wadman irad gilig na lansangan ya akarakar so tonggal kaparis a Guardia Veterana ya susunsonen da ran ibabáki la ray estudiante ran ompápaway a manlalapod Universidad ya andi esel day arum, ambilbilunget so lupa ray arum, ampetang so uló ray arum, ya wala rad sikaray manundan mantanyareng no akaarawi laray daiset, tan wala ra met so ompawil la rad abong da. Say inmonaonan asabat to si Sandoval. Maong lay panatawag nen Basilio et ag linmingaw, ya alabas nen atelek.
"Sikato tay gaweey takut ed saray tabol a managtunaw na kanen ed bituka tan pait, lanoren day pakangel!" kuay Basiliod nunot to.
Say ontumbok ya arumog to si Tadeo ya singa lupay Pasko. Asabin siansiay agew a pakagamor tod abayag lan pirawat ton anggapoy urong a mabayag.
"Antoy agawa, Tadeo?"
"Anggapoy klasi ya katiktikeyan lay sakey simba, bayaw! Sankaabigan! Sankarakpan!"
Tan apaplosen toray lima to ed baleg a liket to.
"Akin, antoy agawa a?"
"Ipangaw da itayon amin a kalamanay muyong!"
"Panliliketan mo tan?"
"Anggapoy klasi, anggapoy klasi!" kuanton inmarawi la ya ag onupot ed laman toy liket to.
Anengneng nen Basilion nitanlay Juanito Pelaez ya amespesiaw so lupa to tan singa mangaatap; pati samay bukot tod beneg nanmaliw ya atagtagey ed gaway ganat ton onaarawi. Sikatoy sakey ed saray sankabilisan ya angigapon man a muyong nen mapatar ni aarapen da.
"Uy, Pelaez. antoy agawa?"
"Awey, anggapod tay amtak! Anggapod tan ingey akibibiangan ko," kuanton mapalaloy takut; "ibabágak lan sipor ed sikara ya makapalpalek ira tan a pamaakaran tan ag ira onyari... Ag tua ya imbagak itan?"
