Ag amta nen Basilio no imbaga to ono andí, balet ta diad pamagusto to;
"On, agay kala," kuanto. "Balet ta anto tay agawa a?"
"Tua, anto? Tasian mo, sipor lan sungpa ak....tasian mo, a agmo lilingoanan!"
"On, kuanko lamet, on, balet ta antoy agawa?"
"Nengneng mo, tási taka! Agak akibabálin balot ed saray kalamanay muyong no ag bukor labat na panisimbawak ed sikara!.....ompano paandien mo naani! Akauley ka saló!"
"Andi, agko paandien, balet ta antoy agawa, anak na Dios?"
Arawí la balet si Juanito, ta anengneng ton onaasingger so sakey a guardia tan mapalaloy takut ton erelen da.
Amaarap si Basiliod Universidad ta nengnengen to agla piga no lukas ni opisinay sekretario tan pangábatan to met lay balbalita. Kapot so opisina, tan magulogulod mad Universidad. Onsegep, onakseb irad takayan so papári, militar, totoo ran partikular, abogado, tan doktor iran mamatatken la ya pangisaklang da lági bengat lan pakatulong dad Uley ed dadalanen ton kaatapan.
Abantag toy kaaro ton Isagani ya amespesiaw so lupa to, nengneng toy mansasboy liknaan to tan napnoy dalang na kalangueran, a sasalitaan toy pigaran kaklasiyan to ed bosis a maksil ya singa anggapoy walad sikato siopa may makangel.
"Singa ag nasisia, sinyores, singa ag nasisia ya sakey labat lan andi kakabaliksan ya agawa et makasengeg lay kabuybuyak tayo tan ibatik tayon singa saray anuyaw ed pakanengneng day tootoon payagpayag ed kapasolan! Akin ononaona ya pa lágin nipangaw iray tubonbalo nisesengeg ed panangiagel ed kawayangan? Iner so kawalaan day inaatey, iner so kawalaan day pinapaltog ey? Akin et itapat ira natan ey?"
"Siopa lamet balet kasi atapis a nansulat iran tan a paspaskin?" kuay tepet na sakey ya ampetang so uló to.
"Antoy walad sikatayo ey?" kuan met na ebat nen Isagani; "antoy pakakaukolan tayon mangamta ey? Akauley iran mamapaway! Bangta agtayo amtan petepeteg no panoy inkasulat da, anggapoy pakakaukolan tin mangipangtay katouran tayod oniaran bekta! No iner so kawalaay kaatapan dimay nepeg tayon dagoen ta dimay kawalaay kagalangan! No say lugan
