daran tan a paskin et ontukey ed kabintaan tan liknaan tira,
siopa may angisulat sustoy ginawá to, nepeg tin pisalámatan tan
andí abalan yarum tid pirma toy kangaranan tayo! No ag ira
onnepeg cd sikatayo, saray gawa tan konsiensia tayon díli, masarag laran pakapatnagay agtayo yabubon tan masulosulok laran
mangilában ed sikatayo ed anto man ya ipakasalanan dad sikatayo....."
Kangel nen Basiliod sarayan pananalita anggaman atagey so aro tod Isagani, pinmoliktar tan imanla. Kapilítan toy onlad abong nen Makaraig ya salitaen so piutang to.
Nen asingger lad man ed abong nen estudianten mayaman, naimano toy esaesan tan makapappainap a pansisinyasan daray kabkaabay. Si Basilio ta agto amta no antoy makasengeg, intuloy ton andi pagpagay panaakar to tan tinmubong dimad pinto. Sinabat na duaran guardiay Veterana ya tinepet no antoy labay to. Atalusan nen Basilio ya asiglatan toy inakar tod man balet ta agla makasuner.
"Labay kon pinengnengan si kaarok a Makaraig." kuanton mareereen.
Nannengnengan ira may guardia.
"Alagar ki dia," kuay sakey ed sikara; "alagar yoy yakseb nen kábo."
Kinetket nen Basilioy bibil to tan singa to ra lamet sankarengel iray salita nen Simoun.... Anto, erelen day Makaraig? Sinmebang ed nunot to, balet ta ag tinmalek a manepet.
Ag nanalagar ya abayag; diad saman a bekta onaakseb lay Makaraig a masaysayaksak a mitotungtong ed kinen kábo ya tomtumboken day sakey ya alguacil.
"Panon? Pati sikayo met, Basilio?" kuanton tinepet.
"Linmaak dian nengnengen ta kayo....."
"Masurin kagagawa!" kuay Makaraig a manelek; "no mareen iran panaon, paliisan yo kami...."
Tinepet nen káboy ngaran nen Basilio, insan to binukay so sakey a listaan.
"Manaaral kayoy Medicina, tan manaayam kid lansangay Anloague?" so ontumbok a tepet nen kábo.
Inketket nen Basilio lamet ed bibil to.
"Maong ta apatikeyan yoy kurang mi," kuanen kábon intuloy a bansag na impangitapew toy lima tod abalá nen Basilio; "periso kayo!"
