lay lupa tan mankonkonwari, saray mangimemermer a masulit
ed kawayangay panagnunot, tan panagsalita. Diad sayan dálin,
amin a kaisipan a mawayang, amin a salitan aliwan anyeweng
na linawa ray walad pakayari, ipapasen ya filibusterismo ono
katotongangá tan pilalek a pisiyan ed Inan Bansá, tan amta yon
petepeteg no antoy kabaliksan ton tan. Anggapo met lay ambágel ya toon nisesengeg ed pamerá to labat na linawa ton
pangibesngaw ton pangipangel ed arum na nununoten to et,
ipalaran toy panirap tan kipaunong to!"
"Anto tara bilang so panamairap odino panamaunong ya agawad sikayo a?" kuay tepet nen pári Fernandez ya intangwá toy uló to; "agtakayo pinaulian a nansalitan andi gimorgimor ed klasik? Ontan man, sakey kayon nilikor ya no tuay ibabága yo, nepeg takayo komon a banoen ta piano nalápag so totuntonen, tan napasakbayan lan ag onkayamkam so mauges a kálar!"
Akaimis si Isagani.
"Pisalámatan koy kuanyo tan agko la supiaten no nilikor ak ono andí; akoen ko tan a pangipapasenan yod siak, ta pian akoen yo met so pangipapásenan kod sikayo, ta diad siak sakey kayo met a nilikor; tan manlapod agtayo dia salitaen iray nilikor one niduma, tan agtayo met yeesel so inkasikatayon díli, kanian mas maong la komon, tan pikasik ya ed sikayon propisor ya isananey yo lay tungtongan."
Anggaman nababalíta lan malokak so panagnunot nen pári Fernandez, tinmanguá tan ninengneng ton napnoy kelaw si Isagani. Lalon mawayang ni manayay panagnunot ton man a tubonbalo nen say isip to wari; anggaman tatawagen toy propisor, natalusan a diad loob to et ipapasen ton kapára to, tan napatnagan ya ed intalek ton mangipapasingayew. Si pári Fernandez manlapod masilib tan amta toy gawaen to, aliwa labat lan inako toy impasingayew nen Isagani no agta pinalakbatan to tan nanparungtal ya nankuan:
"Apakpaknaan ko tan!" kuanto; "balet ta kerewen kon agyo nenengnengen ed siak so propisor yo; sakey ak a párin ampotí tan sakey kayon estudianten pilipino.....ag onsulok, ag onkulang. Tan natan tepeten kod sikayo, antoy labay dad sikami na saray estudianten pilipino?"
Abiglaan si Isagani; Agto aparaanan iman a tepet. Aliling toy sakey a duyok a bengatbengat apalbot legan a manpaparaan.
