"Aliwa ak ya Uley tan agko naebatan iray gawa to. Natan, antoy labay day estudianten gaween min papári ya makapaabig ed sikara ed anggaay loob na nayarian mi ey?"
"Say agyo panetdet a pangimermer ed panagbangat no ag ingen tulongan yo."
Pinmeyeng si dominiko.
"Aliwan sikato yay panagnunot kon díli, balet ta kabaliksan ton tay kekerewen yoy panbitkel mi," kuanto.
"Nalilingo kayo, say kekerewen mi say ipaliis yod dalán pian agkayo natalapos a nagatinan."
"Hm!" kuanen pári Fernandez a tinmondan sinonunot, "say igapo yo komon a kerewen samay aliwan mairap, bengat la bilang a nayarian min iter ya ag napaabebay galang tan ag kaderalay nibiig iran inabuloy ed sikami, ta no bilang makapanaabet itayo ya makapanbilay itayod kareenan, ag kasi lalon abig nen say nagagawa natan a busolan tan ag panpía?"
"No ontan sirin salitaen tayo ray minaminá....
"On, isipen kon mas maong ta no galawen tayoy angiletnegay abong, nalespak."
"Onla itayo sirin ed saray minaminá, ya paulian tíla ray sengeg," kuay inebat nen Isagani ya makakaimis; "aliwan sikatayo met so panagnunot kon dili"--tan imbaga to yan marandanet "mangoman iray estudiante tan napunas ya amin so irap na linawa no saray manbabangat et apigeren da labat so pikukóno rad sikara.... Satan wala lad lima yo."
"Panon?" kuay tepet nen dominiko, "wala sirin so agda napapaknaay estudiante ed kagagawak?"
"Amá, nanpaknaan tilan nanlapod gapó ya say salitaen tayo aliwan sikayo ni siak. Say pansasalita tayo lapag: saray estudiante anta anggapo la lanti dakel a nanaala ran kaabigan legay taon iran panaayam dad klasi, dakdakel nid sikaray natitilak dad may ligisligis na galang tan kababaingan da no ag ingen amin."
Kinetket nen pári Fernandez iray bibil to.
"Anggapoy mamapasout ed sikaran manaral; maawang niray kaumaan ya ag nababakan natataneman," kuanton inmebat ya amagamagá.
"Nalilingo kayo, walay makadaragdag ed sikaran manaral," kuay ebat nen Isagani ed onman met a tonoy bosis, ya inarap
